Verán Rural de Ponteareas

Chegamos aos últimos días do campamento rural de Ponteareas.

Durante esta última semana do mes os nenos e nenas de Ponteareas desfrutaron dunha saída pola contorna que os levou a visitar a igrexa e o muíño que se atopa pretiño da Fundación Guláns. Visitar estes lugares permitiu aos máis pequenos e pequenas desfrutar dunha andaina pola aldea e coñecer camiños e como é Guláns.

Para traballar con material reciclado, esta semana tiveron a oportunidade de deseñar uns coches con rolos de papel hixiénico e tapóns de botellas. Vehículos que puideron decorar e deseñar como cada persoa quixo.

Xa que a volta ao colexio está preto, dende o campamento rural a cativada realizou unha tarefa de pronunciación e recoñecemento das palabras inglesas que identifican diferentes tipos de prendas de vestir. Que ben pronunciaban!

Tendo en conta que fai pouco tempo se realizaron os Xogos Olímpicos en París, dende o campamento de Guláns os nenos e nenas tiveron que enfrontarse a diferentes probas deportivas imitando uns Xogos Olímpicos.

E para ter un bo sabor de boca non hai mellor cousa que converterse en reposteiros e reposteiras por un día e manchar as mans para cociñar unhas deliciosas madalenas con chocolate. E tamén, seguir manchando as mans con pintura para decorar uns camisetas que necesitaban dun toque especial.

Por último, un adianto de outros eventos próximos… viaxe en tractor… visita dunhas persoas que se dedican á música…. saída a Ponteareas….. ver a actuación dun mago…. agasallos…

Teñen moito lío este final de mes…

Nesta primeira semana do mes de agosto os nenos e as nenas do campamento rural de Ponteareas comezaron a quincena participando en infinidade de actividades.

O primeiro día tiveron xogos de presentación para coñecerse entre todos e todas e comezar a interactuar en grupo. E que mellor forma de facelo, que xogando ao BINGO.

Para facer un repasiño de idiomas traballaron os números en inglés e ,ao mesmo tempo, traballaron a educación plástica pintando e recortando os números.

O luns, saíron a facer unha ruta pretiño do Río Tea que os levou a visitar un parque de Ponteareas. Que ben o pasaron!

E nos últimos días, os máis pequenos e pequenas puideron levar os seus vehículos á casa cultural de Angoares para dar unhas voltas e facer algunha que outra carreira de obstáculos. E tamén puideron prensar flores en camisetas con axuda duns paus de madeira. Canto estiveron petando!  

BENVIDO AGOSTO!

Nestes últimos días do mes de xullo no campamento rural de Ponteareas os máis pequenos e pequenas tiveron a oportunidade de realizar unha viaxe en chimpín para visitar unha granxa de polos da contorna que conta con 32.000 poliños pequenos nacidos o venres 26 e o luns 29 de xullo. Os nenos e nenas puideron tocalos, ver como comen e beben e mesmo ver como se amontoaban uns con outros. Esta actividade contou coa colaboración dun veciño e dunha veciña que levaron ao grupo en chimpín. Unha viaxe en chimpíns que contou con adiantamentos ou mesmo con algún bucinazo.

Outra das actividades que se realizaron foi un contacontos no que os nenos e nenas leron dous contos en grupo e logo tiveron que facer unha representación teatral das obras literarias.

E para manchar un pouco as mans, os cativos e as cativas viviron a experiencia de amasar plastilina caseira. Tarefa que axudou a experimentar emocións como alegría ou mesmo, nalgún caso, o asco. Pero o importante é que o resultado final gustou a todos e todas.

E finalmente, felicitar a dous dos integrantes deste campamento de verán que estes últimos 15 días estiveron de cumpleaños. MOITAS FELICIDADES!

QUE BEN REMATAMOS O MES DE XULLO!

Chegou a segunda quincena de xullo e con ela unha nova aldea que visitar en Ponteareas, esta é Prado.

Nestes primeiros días de campamento rural en Prado tivemos actividades de presentación para coñecernos e saber con quen imos compartir esta segunda quincena de xullo.

Durante as tarefas os nenos e as nenas puideron realizar:

• Xogos de imitación de bailes musicais como a canción “waka waka”.
• Xogos nos que nos adentramos en vocabulario de froitas e vexetais en inglés.
• Unhas carreiras de soplido de pelotas de ping-ping.
•  E xurdiron moitas risas e colaboración á hora de empregar cartas como as do “uno” ou o “dos”.

Espérannos moitos días de entretemento por diante, non te perdas as novidades!

Unha semana máis os nenos e nenas do campamento rural de Prado en Ponteareas están a realizar moitas actividades entretidas.

Tiveron unha andaina pola contorna para visitar a Igrexa de San Nicolás de Prado e ademais realizaron algúns xogos na área recreativa do lugar.

Dentro das instalacións fixeron actividades nas que estivo presente o inglés; realizaron papiroflexia na que varias ras foron as protagonistas; intentaron encestar unhas pelotas de ping-pong en vasos con auga ou mesmo tiveron unha procura do tesouro que trouxo consigo a construción dun puzzle.

Un dos días, debido ás altas temperaturas meteorolóxicas, tivemos sesión de cine na que puideron realizar o visionado da película “Toy Story 4”.

E gracias aos veciños e veciñas da zona puidemos contar coa sorte de realizar unha viaxe en chimpín que nos levou a visitar unha hípica e logo percorrer a zona do río Tea.

Que ben o están a pasar !!!

Comeza o campamento rural en Ponteareas, concretamente tocou a quenda na aldea de Bugarín. Nestes primeiros días de verán os máis pequenos e pequenas puideron desfrutar de actividades ao aire libre nas que os conos, as pelotas, os aros ou as cordas foron os protagonistas. Ademais o tempo meteorolóxico permitiu que puideramos celebrar unha festa da auga na que non puideron faltar as risas e a alegría de desfrutar dunha molladura. Por outra parte, non esquecemos repasar idiomas, de aí, que algunhas das actividades fosen en lingua inglesa. E para desconectar un pouco e estirar as pernas tivemos o pracer de facer unha ruta pola aldea e coñecer algúns aspectos da cultura tradicional galega como ver a igrexa e o cruceiro do pobo.

Continuaremos con máis aventuras…