XOECON Campamento de Verán de Mesía

FIN DO CAMPAMENTO XOECON

Pese a que esta era a última semana do noso campamento, non baixamos o ritmo nin por un segundo! Seguimos facendo un montón de cousas: guerras de auga, deportes, piscina e sobre todo manualidades. Entre outras cousas, como semella que o curso que ven teremos que seguir usando mascarilla, fixemos uns cordóns personalizados con nosos nomes para non perdela.

Para poñer punto e final ao campamento tivemos unha visita moi especial, a do mago Charlangas, que nos deixou a todos alucinando cos seus incríbles trucos! E como non, a correspondente festa de despedida na piscina, con merendola incluída.

Esperamos que os nenos e nenas de Mesía desfrutaran moito durante estes dous meses e que para o ano repitan. Ata entón, botarémolos moito de menos.

INAUGURAMOS A ÚLTIMA QUENDA DO CAMPAMENTO

Esta semana comezámola recibindo aos nenos e nenas que nos acompañarán durante a última quincena do campamento XOECON. Realizamos xogos deportivos e manualidades e tamén aproveitamos o bo tempo para divertirnos na piscina.

Para as manualidades e obradoiros seguimos apostando polo emprego de materiais de refugallo, xa que queremos insistir na importancia da reciclaxe. Desta volta, os máis maiores, aproveitaron cartóns de leite e zume para realizar as súas propias carteiras e, os máis pequenos, fixeron uns fantásticos prismáticos con botellas de plástico.

Tamén levamos a cabo unha busca do tesouro que foi todo un éxito; os nosos e nenas demostraron unha vez máis que son uns expertos exploradores.

DESPEDIDA DA PRIMEIRA QUENDA DE AGOSTO

De novo, toca despedida. O verán está a pasar moi rápido e xa dicimos adeus aos nenos e nenas da primeira quincena de agosto. Durante estas dúas semanas non paramos: cociñamos, xogamos, fixemos deporte e tamén obradoiros de barro.

Coma nas anteriores ocasións, pechamos quincena cunha gran festa, desta volta na piscina! Tivemos un inchable na auga e o xa tradicional tobogán xigante do campamento XOECON. Por suposto, non faltaron as lambetadas e un cóctel axeitado á ocasión.

ESTREAMOS O MES DE AGOSTO EN MESÍA

Iniciamos o mes de agosto, e por tanto, tamén nova quenda no campamento de Mesía. Aínda que esta semana foi máis curta do normal, tivemos tempo suficiente para ir quentando motores! Fixemos galletas, talleres de barro, manualidades, xogos deportivos…

Ademáis de todo isto tivemos a sorte de poder despedir a semana cunha divertida actuación teatral.

DESPEDIDA DA SEGUNDA QUINCENA

Despois doutras dúas intensas semanas, toca despedir a segunda quenda do campamento en Mesía.

Para rematar por todo o alto realizouse unha xincana, na que os nosos rapaces e rapazas volveron demostrar a súas grandes habilidades para superar todo tipo de probas e retos.

Tamén acabamos de dar forma á  nosa camiseta oficial XOECON 2021, e por suposto, celebramos a festa de fin de campamento. Os nenos e nenas convertéronse en chefs por un día e cociñaron as súas propias hamburguesas,  que estaban boísimas!!

COÑECENDO MÁIS A FONDO O NOSO ENTORNO

Comezamos a segunda quincena en Mesía, o que quere decir que hai novos nenos e nenas no noso campamento!

Desta volta quixemos que coñeceran un pouco máis a contorna, polo que organizamos unha xincana por Xanceda. Os rapaces e rapazas foron percorrendo a parroquia polos negocios locais e edificios públicos contestando as preguntas que lles ían formulando sobre o noso concello, para rematar descifrando unha mensaxe final.

Tamén visitamos a Casa Grande de Xanceda, onde tivemos a oportunidade de ver moitos animais: cabras, ovellas, ponis, coellos,… e por suposto, vacas. Puidemos ver  tamén a súa fábrica de iogures, incluso nos regalaron un para merendar!

Ademáis de todo isto, seguimos realizando diferentes actividades deportivas e manualidades e comezamos a confeccionar as camisetas do campamento.

REMATA A PRIMEIRA QUINCENA DO CAMPAMENTO XOECON

Que rápido nos está a pasar o tempo! Xa toca despedir a primeira quincena do noso campamento. Facémolo despois de realizar un montón de manualidades: peonzas, lapiceiros, marcadores de lectura, marionetas … todas elas empregando na maior parte dos casos material reciclado, xa que todos e todas sabemos a importancia de darlle a obxectos cotiáns unha segunda vida, evitando así xerar refugallo innecesario.

Tamén levamos a cabo diferentes actividades deportivas, no caso dos máis maiores: baseball, tenis, baloncesto, hockey, … Os máis pequenos tamén demostraron a súa habilidade motriz superando en tempo récord circuítos ben complicados.

Aínda que esta semana tampouco tivemos demasiada fortuna co tempo, logramos desfrutar de dous días de piscina.

O broche final desta quincena puxémolo cunha saída ao cine para ver a película Spirit, na que a protagonista resulta ser unha rapaza tan valente como os rapaces e rapazas de Mesía.

COMEZA O CAMPAMENTO DE VERÁN NO CONCELLO DE MESÍA

Un ano máis o campamento XOECON está de volta en Mesía, xa tiñamos ganas! Despois de pasar un curso bastante complicado debido á crise sanitaria, os nosos rapaces e rapazas xa estaban desexando divertirse. A pesares de que o tempo non nos acompañou esta primeira semana, fixemos de todo un pouco: obradoiros de manualidades, actividades deportivas e incluso puidemos desfrutar algún día da piscina. E isto é só o principio!