Escola de Verán de Dodro

Xa estamos de volta, familias!

Esta semana, aproveitando a celebración dos Xogos Olímpicos de Tokyo, decidimos desenvolver as nosas propias Olimpíadas na Escola de Verán de Dodro. Facendo uso dos recursos naturais que nos brinda a contorna do centro, así como de diferente material reutilizado e/ou reciclado, realizamos diferentes obradoiros e cantidade de xogos. Tras a elaboración de medallas, bandeiras e pancartas, demos comezo ás Olimpíadas, nas que os nenos e as nenas competían pola medalla nos seguintes deportes: carreira de relevos, ximnasia rítmica, bádminton e fútbol. Pero ó final, como o importante é participar e pasalo ben, todos e todas as participantes recibiron a súa medalla.

Ademais das Olimpíadas, desenvolvemos outros obradoiros, como son “os seres vivos” e os de igualdade. En canto ás actividades realizadas acerca dos seres vivos, estudamos as súas funcións vitais, así como a importancia das cadeas tróficas nos diferentes ecosistemas. En relación cos obradoiros de igualdade, centrámonos na identificación de roles e estereotipos de xénero en contos tradicionais e/ou en personaxes de xogos de rol.

Por outra banda, realizamos diferentes técnicas de relaxación e practicamos ioga. Encántanos escoitar música clásica mentres pintamos mandalas!

Mañá é o último día da segunda quenda de Xullo, e toca despedirse dalgúns nenos e nenas, polo que decidimos realizar unha festa de disfraces, na que desenvolveremos moitísimos xogos e o pasaremos en grande!

Ata aquí as novas desta semana. Non queda máis que agradecer ás familias que nos acompañaron neste mes de Xullo, por facer tan agradable esta experiencia. Dende a Escola de Verán de Dodro desexámoslle un feliz verán!

Saúdos, familias.

As árbores.

Boas tardes, familias!

Estades desfrutando do verán? Esperamos que si! Pois os nenos e nenas da Escola de Verán de Dodro estámolo a pasar moi ben, á vez que aprendemos cantidade de cousas novas, non si?

A segunda quenda de Xullo dedicámola ás árbores. Mediante o desenvolvemento de obradoiros e de xogos, tomamos conciencia sobre a importancia que teñen os bosques para o planeta. Tamén estudamos a variedade de árbores autóctonas do noso territorio, á vez que facemos rutas polo recinto escolar para tratar de recoñecer cada unha delas. A deforestación pon en perigo a vida da Terra, polo que tamén poñemos en valor a importancia de plantar, plantando a nosa propia árbore!

Por outra banda, en relación có coidado do planeta, tamén traballamos arredor da reciclaxe, realizando unha serie de actividades que teñen por obxectivo concienciar sobre a necesidade de cumprir a regra das “tres R” -reducir, reutilizar e reciclar- para mellorar o mundo.

Estas son tan só algunhas das actividades que realizamos, entre moitísimas máis: obradoiros de igualdade, teatro, mímica, xogos deportivos e cooperativos…

Esperámosvos por aquí a próxima semana, onde vos contaremos máis experiencias do campamento de verán de Dodro.

Saúdos!

Ola de novo!

Transcorrida a primeira quenda de Xullo, non queda máis que agradecer ós nenos e nenas participantes, así como ás súas familias e ó conxunto de profesionais que fan posible o correcto funcionamento da Escola de Verán, e o máis importante, que a dotan dun sentido de comunidade e de compromiso mutuo.

Os primeiros días de campamento adicámolos, principalmente, ó desenvolvemento de dinámicas de presentación, co obxectivo de garantir o coñecemento entre os/as participantes na Escola de Verán e os seus monitores/as, que os acompañarán ó longo desta experiencia. Unha vez familiarizados/as cos espazos e cos seus integrantes, realizamos numerosos xogos -de distensión, deportivos, cooperativos…-, bailamos, escoitamos contos e reflexionamos sobre os mesmos, participamos en diferentes obradoiros -xestión das emocións, igualdade, ecoloxismo…- e incluso, cada Venres, fixemos a festa da auga!

E recordade, estamos en tempos de pandemia, polo que é importante seguir extremando precaucións para que os máis pequenos/as poidan seguir disfrutando do verán no campamento.

Feliz día familias!

Moi boas, familias!

Dende a Escola de Verán de Dodro dámosvos a benvida a este espazo de difusión de noticias, onde vos manteremos informadas das diferentes actividades lúdicas e formativas que se están a desenvolver no campamento, baixo o lema “Non hai planeta B!”.  

Estade atentas ás novas, pois iremos actualizando as noticias cada semana.

Unha aperta!