Campus Deportivo de A Estrada

Un ano máis toca despedirse no Campus Deportivo de A Estrada!

Esta semana vivimos un día moi especial e divertido na Praia fluvial de A Estrada, donde realizamos diferentes xogos nos que os nosos rapaces e rapazas tiveron que amosar diferentes habilidades en cada proba. Carreiras de cangrexos, relevos a cegas, pesca con culler, gymkanas… Xogos nos que a confianza cos compañeiros xogaba un papel moi importante.

Hoxe tamén puidemos desfrutar do triatlón, duatlón e acuatlón nunha xornada na que os nosos cativos e cativas competiron e desfrutaron moito. E para rematar, piscina para todos e todas, e que ben lles sentou coa calor que fixo! Volveron as caras de pena cando tocou despedirse, pero mezcladas con caras de felicidade polo ben que o pasaron. Grazas a todos os rapaces e rapazas por ser tan valentes e vémonos para o próximo verán!!

Xornada de salvamento e socorrismo no Campus Deportivo de A Estrada!

“Aprender é máis fácil se o facemos xogando”

Esta semana no campus tivemos a sorte de contar coa axuda do Clube Acuático Umia que xunto coa nosa excompañeira Antía García, Ainoa, Manu e Dani Andújar lles ensinaron aos nosos cativos e cativas un pouco deste fantástico deporte. Explicáronlles algunhas das probas de salvamento e realizaron carreiras de relevos. Tamén probaron técnicas de arrastre  con maniquís de diferentes pesos, e realizaron salvamento con flopis por parellas. Unha mañá moi entretida  na que aprenderon moito, e da que os nosos pequenos e pequenas marcharon moi contentos.

Xa queda menos para rematar o verán así que estamos a aproveitar ao máximo os últimos días, realizando moitas actividades de deporte e xogos… Seguiremos informando!

Converténdonos en auténticos karatecas por un día no Campus Deportivo de A Estrada…

Comezamos a semana coa axuda do Club Budoyama de A Estrada que veu a mostrarlles aos nosos cativos e cativas o marabilloso mundo do Kárate que pode practicarse como arte, como defensa persoal ou como deporte de combate.  Esta arte marcial tradicional de orixe xaponesa, ademais de ser unha actividade física combativa é hábil e táctica, e require dunha gran habilidade, destreza e velocidade por parte dos karatecas. Por suposto no medio de tanta aprendizaxe as caídas aparatosas e as risas non faltaron. Tamén contamos coa axuda do Club Ciclista Estradense nunha xornada na que como sempre os nosos rapaces desfrutaron e aprenderon moito.

 E como non ía a ser menos, esta quincena despedímola con actividades na Praia fluvial onde entre outras actividades aproveitando o bo tempo que nos está a acompañar en agosto fixemos moitos xogos de auga. E como somos uns afortunados coas nosas instalacións cada día a piscina estase a converter na protagonista, resultando unha tarefa difícil conseguir que saian dela. Como podedes ver non nos aburrimos nada no campus, estade atentos porque seguiremos informando.

Comezamos co mes de agosto no Campus Deportivo de A Estrada…

Gustaríanos destacar con todos vós a capacidade, tenacidade, valentía e forza que teñen os nosos  cativos e cativas nestes tempos tan difíciles. Nunha época de COVID na que todo o que fan ten un protocolo ou normas novas onde eles son especialmente coidadosos e estritos á hora de cumprilas. Probablemente non teñan a liberdade que tiñan antes para moverse nin para descubrir o mundo que os rodea, pero eles e elas seguen ao pé do canón como auténticos valentes e sen perder a inocencia que os caracteriza. Adaptándose á nova realidade desfrutando de cada actividade e deporte como só eles saben. Son e serán sempre o noso exemplo a seguir.

Esta semana estiveron moi atareados desfrutando dunhas mañás moi divertidas de xogos e deporte, aproveitando cada momento que non chove para realizar as actividades ao aire libre aínda que algún dos días fose case misión imposible. Pero o mal tempo non é  ningún impedimento para que nos divirtamos no Campus Deportivo de A Estrada, así que atentos porque a próxima semana ven cargadiña de actividades… Seguiremos informando!

DESPEDIMOS O MES DE XULLO NO CAMPUS DEPORTIVO DE A ESTRADA!

Vimos de vivir unha semana moi completa e chea actividades diferentes…

Comezamos a semana cunhas clases de judo impartidas polo Club Judo Base de A Estrada onde os nosos cativos e cativas descubriron o judoka que levaban dentro, e tamén contamos coa axuda do Club Ciclista Estradense celebrando unha xornada de ciclismo nas nosas instalacións. Con ambas actividades desfrutaron e aprenderon moito mellorando a súa técnica e descubrindo disciplinas descoñecidas para algúns.

E aínda que o tempo non acompaña moito sempre que podemos rematamos as nosas xornadas na piscina, e que ben o pasamos… E para despedir este mes celebrámolo na Praia fluvial de A Estrada onde os nosos rapaces e rapazas fixeron a súa particular competición realizando diferentes xogos e probas de habilidade, técnica e equilibrio, demostrando todo o aprendido durante todo o mes. Despedimos este mes cargado de bos momentos e preparados para o seguinte… Seguiremos informando…

No Campus deportivo de A Estrada dámoslle a benvida a unha nova quenda!

Vimos de despedir a primeira quincena de Xullo coa axuda do Club Ciclista Estradense, que organizou unha xincana na que os nosos pequenos ciclistas agudizaron a habilidade e equilibrio coa bicicleta. Tamén pasamos un día fantástico na Praia fluvial de A Estrada, na cal fixemos unha ruta de sendeirismo e moitos xogos. Foi un día de sentimentos encontrados xa que desfrutaron moito pero tocaba despedirse dalgún compañeiro.

Esta nova quincena comezámola con moitas ganas, os nosos pequenos seguen a desfrutar moito de cada actividade que realizan. Calquera dos deportes que practican é unha boa escusa para pasalo ben cos seus compañeiros e compañeiras. Cada participante está a aprender a traballar en equipo e a participar activamente nas actividades sendo conscientes de que o máis importante é desfrutar e aprender que sempre se gaña sexa cal sexa o resultado. E aínda que o tempo non acompaña moito seguimos desfrutando na piscina, a actividade favorita dos nosos cativos e cativas. Seguiremos informando…

ESTAMOS DE VOLTA UN VERÁN MÁIS NO CAMPUS DEPORTIVO DE A ESTRADA!

Despois de este ano tan complicado onde os rapaces e rapazas foron uns valentes e o mellor exemplo para todos, toca desfrutar do verán  e no Campus Deportivo de A Estrada sabemos moi ben como facelo.

Un ano máis, nervios a flor de pel … Para algún comeza unha nova etapa, para outros volver a ver a eses amigos cos que pasar e desfrutar un verán máis facendo moito deporte. E aínda que o tempo non nos acompañou esta primeira semana iso non foi un impedimento  para divertirnos e practicar deporte. Unha toma de contacto  con deportes que algún nunca practicaran como o floorball, ultimate, colpbol … moi atentos e aprendendo, pero sobre todo desfrutando de cada actividade. Outros deportes que xa dominaban como  tenis, fútbol 7, baloncesto, bádminton, balonmán … Cada nena e neno trae as súas propias normas, pero entre todos chegan a acordo e os xogos cumpren todos os seus obxectivos… practicar deporte, pásalo xenial e sobre todo rir moito!