TeoMadruga Ramallosa

DÍA DA FAMILIA

Moi bos días madrugadores e madrugadoras, unha semana máis vimos con novas para contarvos.

O pasado día 15 de maio foi o día da familia e como non hai nada máis importante que a nosa familia, os nenos e nenas do cole da Ramallosa quixeron adicar un anaquiño do seu tempo a facer algo especial para este día. Elaboraron unhas tarxetiñas con un gran corazón, no cal, puideron debuxar a súa familia. Temos moita diversidade de debuxos, incluso quen debuxou a bisavós e bisavoas. Quedaron preciosas!

Por outra banda, pero non menos importante, durante esta semana tamén puidemos realizar algún xogo todos xuntos. Tamén tiveron tempo para o xogo libre, pintar e debuxar.

Isto é todo! Feliz semana.

SEMANA DE XOGOS!!!

Moi bos días madrugadores e madrugadoras, unha semana máis aquí estamos con novidades para contarvos.

Esta semana deixamos un pouco a un lado as manualidades para poder xogar todos xuntos, xa que os máis pequenos e pequenas viñeron con moita enerxía. O xogo estrela foi a mímica, desfrutárono moito! Aínda que tamén temos algún e algunha tímida que de momento non se animaron a imitar pero si a tentar adiviñar o que facían os seus compañeiros, seguro que se van ir soltando.

Por outra banda, coma tódalas semanas, tamén tiveron tempo para o xogo libre, onde usan moito a súa imaxinación e co cal nos rimos un cacho.

Isto é todo por esta semana, ata a seguinte!

DÍA DA NAI

Moi bos días madrugadores e madrugadoras, unha semana máis vimos con novas para contarvos. Como ben sabedes o domingo 1 de maio foi o día da nai, polo que no colexio da Ramallosa non quixemos deixar de celebrar este día tan sinalado no noso calendario. Os máis cativos e cativas puideron elaborar unha pequena tarxeta para felicitar as súas nais en este día tan especial, esta consistía nunha árbore realizada coa súa man. Logo puideron colocarlle follas e algúns corazóns. Cremos que quedaron unhas tarxetas moi bonitas e esperamos que vos gustasen moito.

Por outra banda, tamén tiveron tempo para o xogo libre e algún que outro xogo dirixido, desfrutando así dos ratiños libres.

E isto é todo por esta semana. Feliz semana!!

VOLTA A RUTINA CON CALMA

Moi bos días madrugadores e madrugadoras, tras uns días de vacacións toca volver ao cole, polo que volven os madrugóns e a rutina.

Na  Ramallosa quixemos tomar con moita calma isto da volta, xa que sabemos que logo de tantos días de festa sempre costa un pouquiño adaptarse de novo. Estes días os nenos e nenas estiveron adicando a maior parte do tempo ao xogo libre. Por outra banda, tamén puideron dedicar un tempo a lectura, xa que o pasado día 23 de abril se celebraba o día internacional do libro, e que mellor forma de celebralo que lendo miles de historias.

E isto é todo por esta semana, para a seguinte máis e mellor, xa que xa estamos a tramar algo.

Feliz semana a todos e todas!

VACACIÓNS

Moi bos días madrugadores e madrugadoras, por fin chegaron as esperadas vacación, a pesares de ser curtiñas os nosos cativos e cativas esperábanas con ansia pero antes contarémosvos o que fixeron esta semana os nenos e nenas do cole da Ramallosa.

Para rematar este trimestre fixemos a nosa propia galiña de pascua. Os rapaces e rapazas puideron pintar as súas galiñas. Para isto puideron estampar circuliños vermellos e brancos por toda a galiña, logo colocaron os “ovos”, algún esperaba ovos de verdade ou mesmo de chocolate pero… fixémolo con pompóns, para evitar tentacións.

A todos e todas lles encantou o resultado polo que esperamos que a vos tamén.

E ata aquí chegou o segundo trimestre, vémonos a volta con moitas ganas.

Felices vacacións!!!

TIC TAC TIC TAC

Moi bos días madrugadores e madrugadoras, como ben sabedes xa non queda nada para as vacacións de semana santa, outro trimestre que está apiques de rematar e iso xa se empeza a notar nos máis pequenos e pequenas, andan máis activos ca nunca!

Esta semana tiveron moito tempo para o xogo libre pero claro está que sempre hai que adicarlle tempo as nosas manualidades, e como vos diciamos xa non queda nada para a pascua polo que a temática destes días vai sobre isto. Comezaron decorando uns pequenos adornos moi especiais, deixando renda solta a creatividade de cada un e cada unha. Quedaron súper bonitos!!!

Por outra banda, tamén están a traballar en outra cousiña pero aínda nos queda un pouquiño para  rematar polo que teredes que esperar uns días máis para descubrir o que estamos a facer.

Feliz semana e ata a seguinte!!

XOGAMOS COAS EMOCIÓNS

Moi bos días madrugadores e madrugadoras, unha semana máis os nenos e nenas da Ramallosa vos queremos contar no que estamos a traballar.

Acordádesvos do conto que lemos a semana pasada, O monstro das cores? Pois gracias a el estivemos a traballar un pouquiño máis as nosas emocións: a alegría, tristeza, medo, ira, amor… e algunhas outras máis.

Pero como ben sabedes, no cole da Ramallosa a todo lle buscamos algún xogo, polo que realizamos o noso propio xogo das emocións. Os nenos e nenas tiveron que realizar previamente os seus propios dados, no cal en cada cara aparecía unha emoción. Logo usámolos para representar as emocións que nos tocaban ao tirar. Pasamos un bo rato!

E isto é todo por esta semana, ata a seguinte!

MONSTRO DE CORES

Moi bos días madrugadores e madrugadoras, unha semana máis os nenos e nenas do cole da Ramallosa vimos con novas que contarvos.

Durante este mes estamos a traballar as emocións, e que mellor que comezar lendo o monstro das cores. Para a nosa sorpresa os máis pequenos e pequenas sorprendéronnos coñecendo as cores e as emocións a que corresponde cada unha delas. Quedaron moi contentos con este conto!

Por suposto,  tamén aproveitamos para seguir traballando as emocións con diferentes actividades que remataremos ao largo da semana, pero para saber de que se trata tocaravos esperar unha semaniña máis.

Feliz semana e ata a seguinte!

8M

Moi bos días madrugadores e madrugadoras, unha semana máis os nenos e nenas do cole da Ramallosa vimos con novas para contarvos.

Como vos contabamos a semana pasada, o 8 de marzo celebrouse o día internacional da muller, día moi sinalado no noso calendario por iso quixemos facer algo especial para conmemoralo. Puidemos empezar explicándolle aos nenos e nenas a importancia desta data, así como falamos un pouquiño máis da igualdade de xénero nos nosos días. Logo puideron realizar un oito moi especial, con cartolinas e boliñas de papel en color violeta. Tamén puideron escoller a frase que poñeriamos no noso oito.

Pensamos que quedou moi chulo, esperamos que vos guste tanto coma a nos.

Feliz semana! Ata a seguinte!

VOLTA A RUTINA

Moi bos días madrugadores e madrugadoras, tras uns días de descanso volvemos a rutina con algunhas novidades para contarvos.

A semana pasada, como so tivemos cole dous días, aproveitamos para dedicarlle este tempo ao xogo libre. Os nenos e nenas puideron xogar a diferentes xogos de mesa, onde triunfan os puzzles entre os máis maiores e os xogos de construción entre os pequeniños e pequeniñas.

Por outra banda tamén tivemos tempo de darlle a cabeciña para pensar en que podiamos facer para o 8M, xa que é día moi sinalado no noso calendario e o cal non podíamos esquecer, pero para saber en que estamos a traballar teredes que esperar unha semaniña máis.

Isto é todo de momento, xa que foi unha semana ben curtiña. Ata a seguinte!

PREPARADÍSIMOS PARA O CARNAVAL

Moi bos días madrugadores e madrugadoras, como ben sabedes xa non queda nada para carnaval, fecha que lles entusiasma moito aos nosos pequenos e pequenas, polo que esta semana estiveron traballando arreo para deixar o noso comedor ben bonito para estas datas.

Comezaron pintando diferentes caras de pallasos, as cales puideron pegarlles flocos para logo colgar polo noso comedor.

Por outra banda, tamén utilizaron algunhas desas caras para elaborar os nosos  gran pallasos. Pintaron, decoraron e ata lle fixeron pajaritas para que quedasen ben bonitos. Esperamos que vos gusten!

No cole da Ramallosa estamos preparados para a gran troula do carnaval, e vos?

MOVENDO O ESQUELETO

Moi bos días madrugadores e madrugadoras, unha semana máis os nenos e nenas do cole da Ramallosa traemos novas para contarvos.

Como ben sabedes as mañás seguen sendo bastante frías polo que decidimos entrar en calor xogando ao twister unha semana máis, este é un xogo que engancha bastante aos máis pequenos e pequenas.

Por outra banda, xa que de mover o corpo se trataba, os nenos e nenas elaboraron diferentes animais móbiles. Dende tartarugas a gatos ou monos. Quedaron moi chulos!!

É por último, como non podía ser menos en este día, hoxe 14 de febreiro adicamos un tempo ao día dos namorados. Un día que lle causa bastante interese a algún dos nosos pequenos e pequenas, de feito algún ata se animou a escribir algunha que outra carta. Viva o amor!!!

Feliz semana!!

EMPEZANDO FEBREIRO CON GANAS

Moi bos días madrugadores e madrugadoras, unha semana máis vimos con novidades para contarvos.

Comezamos febreiro con moitas ganas pero tamén con moito frío, polo que pensamos que non viría nada mal facer algo de actividade física para escorrentalo, por iso durante esta semana estivemos a facer diferentes xogos cos que entrar en calor.

Os días de máis frío puidemos xogar ao twister. Debido a situación sanitaria os nenos e nenas xogaron por grupos burbulla, é dicir, por clases para evitar así o contacto cos demais compañeiros e compañeiras, xa que é un xogo no que o distanciamento social a veces é complicado.

Por outra banda, puidemos saír ao patio a botar algunhas carreiras, xogar a bomba e a Simón di, xogo que lles gusta moito.

Logo tamén tiveron tempo para o xogo libre no interior así como pintar porque como ben sabedes é a actividade favorita dos nosos nenos e nenas da Ramallosa.

E isto é todo por esta semana. Ata a seguinte!

CELEBRAMOS O DÍA DA PAZ

Moi bos días madrugadores e madrugadoras, o pasado día 30 de xaneiro celebrouse o día da paz polo que os nenos e nenas do cole da Ramallosa adicaron algúns días a realizar unha manualidade sobre isto.

Puideron realizar un marca páxinas en forma de paxariño, simbolizando así a liberdade. Deron renda solta a súa creatividade e pintaron os paxaros como máis lles gustaban a cada un deles e delas, habendo así gran diversidade.

Por outra banda, durante esta semana tamén tiveron tempo para o xogo libre e a lectura.

E isto é todo por esta semana. Ata a seguinte!!!

TURNO DAS MARIONETAS

Moi bos días madrugadores e madrugadoras, outra semana máis vimos con novas para contarvos.

Acordádesvos que a semana pasada vos falamos do noso pequeno teatro? Pois esta semana seguimos traballando en iso. Os pequenos e pequenas do cole da Ramallosa pilláronlle o truquillo a iso de interpretar por iso esta semana seguimos contando diferentes historias co noso teatro.

Por outra banda, tamén puideron realizar diferentes marionetas de papel. Actividade que lles gustou moito aos nenos e nenas.

E como non podía se doutra forma tamén tiveron tempo para o xogo libre, pintar e ler. Ademais dos diferentes xogos (dirixidos) de mímica que realizaron.

Feliz semana e ata a seguinte!

TEATRO NA RAMALLOSA

Moi bos días madrugadores e madrugadoras, logo dunha semana tranquiliña para adaptarse de novo ao cole, xa tocaba poñerse a traballar un pouquiño.

Este mes de xaneiro tócanos traballar o teatro polo que no cole da Ramallosa realizamos un pequeno teatrillo para contar historias a través de monicreques ou marionetas.

 Os nenos e nenas puideron escoller diferentes monicreques para facer a súa propia representación, dándolle así o seu toque persoal a contos moi coñecidos.

Por outra banda, tamén xogamos a diferentes xogos de mímica, os cales tiveron moito éxito entre os máis pequenos e pequenas.

E isto é todo por esta semana. Feliz semana e ata a seguinte!

VOLTA A RUTINA!

Moi bos días madrugadores e madrugadoras, toca deixar atrás os días de festa e volver a rutina.

Tras un tempo de descanso, ben merecido por certo, os nenos e nenas do cole Ramallosa volven con moitas ganas e ilusión.

O primeiro día tomámolo con moita calma, poñéndonos ao día do que fixeron os máis pequenos e pequenas durante as vacacións, así como os regalos que tiveron este nadal.

Pero hoxe xa comezamos a traballar un pouquiño, estivemos dando ideas sobre o que imos a facer estas seguintes semanas. Están moi creativos!

Por outra banda, tamén tiveron tempo para o xogo libre e para colorear. Actividade que lles gusta moito.

Feliz semana! E ata a seguinte!

Bo Nadal!!

Chegou o día que tanto estaban esperando os nosos nenos e nenas, mañá último día de clase deste trimestre.

Pero antes de despedirnos deste ano vamos a contarvos o que fixeron esta última semana os cativos e cativas da Ramallosa.

Tiveron moito tempo para adicar o xogo libre, os máis pequenos e pequenas desfrutan moito cos bloques e as pezas de construción.

Por outra banda, tamén estivemos a realizar os pequenos agasallos de Nadal. Renos realizados con cartón, os cales, puideron pintar con témpera. Estes renos ocultan unha pequeniña sorpresa para ca un deles e delas. Esperamos que vos gusten, tanto coma a nos facelos con eles e elas.

E isto é todo por este ano. Bo Nadal familias! Vémonos con máis novas a volta de Nadal.

Felices vacacións!!!

DE CAMIÑO O NADAL.

Moi bos días madrugadores e madrugadoras, como ben xa sabedes non queda nada para nadal. Unha época que lles ilusiona moito aos nosos cativos e cativas, polo que están completamente inmersos en este tema.

Adicaron a semana a facer as súas propias árbores de nadal. Comezaron pintando os tubos de papel e a cartolina da base. Por último puideron decoralas como máis lles gustou. Quedaron moi chulas!

Por outra banda, tamén elaboraron unhas bolas de nadal para decorar as árbores das súas casas.

Pero tamén tiveron tempo para o xogo libre. Triunfando os diferentes xogos de mesa. E como non, unha das actividades que máis triunfa no noso cole, colorear!!

E isto é todo por esta semana. Feliz semana e ata a seguinte!

Non á violencia de xénero.

O pasado 25 de novembro celebrábase o día internacional contra a violencia de xénero, unha fecha bastante marcada no noso calendario, desgraciadamente, polo que os nosos madrugadores e madrugadoras adicaron toda a semana a traballar sobre este tema.

Para comezar, falamos un pouquiño do tema, para saber o que os nenos e nenas sabían sobre isto, puxemos ideas en común e debatimos un pouco, logo realizaron tarxetiñas con frases condenando a violencia.

Por outra banda, tamén realizaron dous pequenos murais. Un constaba dun lazo xigante coas mans pintadas, as cales realizaron os máis pequenos e pequenas,  e unha mensaxe que puideron realizar os e as máis maiores. O outro mural é un corazón formado por pequenas bolboretas de papel de periódico, simbolizando todos os casos de violencia que se dan día tras día.

Tras estas actividades quedounos claro que os nenos e nenas da Ramallosa teñen moi claro o que é a violencia de xénero polo que estamos moi orgullosas deles.

Esperamos que vos gusten as nosas fotiños e ata a semana que ven!

Entre animais na Ramallosa

Moi bos días madrugadores e madrugadoras esta semana no cole da Ramallosa estivemos desenrolando o noso lado máis creativo.

 Os nosos pequenos e pequenas realizaron uns animais un tanto peculiares, pequenos polbos e vermes realizados con oveiras de cartón. Para aproveitar e falar un pouco tamén o tema da reciclaxe, aínda que logo os decorásemos con materiais non reciclados. Quedaron moi ben!

Por outra banda, tamén tivemos tempo para o xogo libre e pintar, xa que é o que máis lles gusta aos nosos pequenos e pequenas. Temos uns e unhas artistazas!

E isto é todo por esta semana, pero xa estamos dándolle voltas ao que farán para a seguinte.

Boa semana!

CELEBRANDO O SAN MARTIÑO

Moi bos días madrugadores e madrugadoras, outra semana máis por aquí nos pasamos para contarvos as cousiñas que van facendo os nosos pequenos e pequenas.

Como vos adiantabamos a semana pasada, o día 11 celebrouse o San Martiño, unha festa moi coñecida no noso concello, Teo. É tradición en este día a celebración dunha feira cabalar na carballeira de Francos polo que nos puxemos mans a obra para realizar os nosos propios cabalos e celebrar a nosa propia feira cabalar.

Comezaron pintando pequenos cabalos para facer guirnaldas, para darlle un toque máis festivo ao noso comedor, e logo remataron por facer uns cabalos con cartolina moi chulos, poñer as crins foi todo unha festa! Esperemos que vos gusten tanto coma a nos.

Ata a seguinte semana!

Benvido novembro!!!!

Dende madrugadores da Ramallosa dámoslle a benvida a novembro con moitas ganas pero sobre todo con moitas actividades por descubrir.

Como ben sabedes o día 11 deste mes celebrase o San Martiño, festividade moi coñecida no noso concello, polo que os nenos e nenas están completamente inmersos en preparar a decoración do noso comedor para este día.

Comezaron pintando pequenos porquiños para facer guirnaldas e debuxaron outros tantos en globos; pero o que máis lles gustou, sen dúbida algunha, foi elaborar os seus propios porquiños con botellas recicladas, quedaron súper ben!!! E están por todo o noso comedor!!

E hasta aquí vos podemos contar esta semana pero para a seguinte prometemos traer moitas outras novas, xa que os nosos pequenos e pequenas seguen traballando duro. Feliz semana e ata a seguinte!

Listos para celebrar Halloween!!

Moi bos días madrugadores e madrugadoras, esta semana vimos cargados de novas, xa que os nosos pequenos e pequenas estiveron a traballar arreo para deixar o comedor ben terrorífico.

Esta semana comezaron elaborando uns gatos negros, con tubiños de papel. Por outra banda, tamén tiveron tempo para elaborar uns esqueletos moi especiais, feitos con bastoncillos, os cales quedaron moi guays pero xulgade vos mesmos. E por suposto, tamén sacaron tempo para colgar no teito do noso comedor diferentes adornos que realizaron, así como tamén outras cousiñas que gardabamos no cole doutros anos. Coa luz apagada mete medo!!!

E con isto todo no cole da Ramallosa estamos máis que listos para celebrar Halloween. Feliz semana! E ata a seguinte.

BENVIDOS E BENVIDAS AO TEOMADRUGA DE RAMALLOSA

Moi bos días madrugadores e madrugadoras, toca darlle a benvida a un novo curso.

Un curso que afrontamos con moitas ganas e con algúns que outros cambios, pero os cales estamos seguras de que aos nosos pequenos e pequenas da Ramallosa lles van agradar.

Por fin se poden sentar xuntos por clases!! Algo que os nenos e nenas demandaban moito o curso pasado. Polo que durante estes días estivemos aproveitando moito isto para deixarlles xogar xuntos, podendo dar renda solta a súa imaxinación. Por outro lado, coa incorporación dos máis pequenos xa empezamos a facer cousiñas con eles e elas. Comezamos a decorar o noso comedor para darlle un pouquiño de vida despois de tanto tempo de vacacións, pensamos que está quedando moi chulo!!

E como ben sabedes no cole da Ramallosa gústanos traballar moito polo que a semana que ven viremos cargados de novas pero agora toca esperar un pouquiño. Feliz semana! Ata a semana que ven!!