TeoMadruga Calo

UNHA PAUSA PARA XOGAR

En Calo estes días recuperamos o xogo en grupos mais grandes, estamos a falar de competicións de parchís, unno, virus 1 e 2 e a baralla española… xogos de mesa clásicos pero coa motivación de poder xogar entre todas/os.

Por outra banda as crianzas de infantil tamén se aventuran a xogar en grupos non tan grandes, cos Pokemon como protagonistas dos seus xogos.

Boa semana familias!!!

NOVOS ESPAZOS …

Esta semana en Calo, a parte de moito xogo en pequenos grupos, andamos pensando e pensando … como nos gustaría que fose o cole, ese espazo no que pasan boa parte do tempo as vosas crianzas.

Así que nesas andamos que pensar seriamente, leva tempo!! Para a semana seguro que xa poderemos coñecer os resultados.

Por certo!… estes días tamén remataron de plantar as sementes as nenas e nenos que faltaban… que tal? Xa brotou algo?

Un saúdo para todas e todos dende Madrugadores Calo!!

… DE CORAZÓN …

Continuamos unha semana mais no Madruga de Calo con xogos, comezando a compartilos tamén en grupos pequenos; nótase moito o cambio, sobre todo na alegría das nenas e dos nenos.

A actividade central da semana tivo un carácter especial, xa que especial tamén é a cita.  Resumímola en: “de corazón”; é algo no que todos os grupos traballaron ao longo desta semana con moitísima ilusión. Agardamos que vos guste, de corazón…

Boa semana familias!!

CELEBRANDO O DÍA DA TERRA E O DÍA DO LIBRO

Esta semana no Madrugadores de Calo, xa de volta das vacacións, centrámonos na celebración o 22 de abril do día internacional da Terra e o 23 de abril do día internacional do libro.

As actividades escollidas para estas celebracións foron un clásico de cada ano, pero cun toque novo. Para o día da Terra elaboramos unhas pequenas macetas reciclando unhas botellas de plástico; primeiro as crianzas decoráronas con esmaltes de cores e logo de secar puxéronlle terra, sementes de flores e un pouco de auga.

Estes días irán chegando as macetas ás vosas casas así que tomade nota: algo de auga, luz e recordade pasalas a outra maceta ou ao xardín directamente cando teñan un tamaño axeitado. Non esquezades que podedes usar a maceta para outra cousa, por exemplo como lapiseiro ou …

Por outra parte para a celebración do día do libro escollemos como actividade a elaboración duns marcapáxinas moi chulos, destacando este ano os de deseño de mandalas. Recordade que

hai grandes libros no mundo e grandes mundos nos libros

Boa semana para todas e todos!!

COELLIÑOS  DE  PASCUA  E… VACACIÓNS!!

Ola de novo familias!! Despedimos a semana recibindo as ansiadas vacacións de Semana Santa, necesarias para coller forzas de cara ao último trimestre de curso.

Toda a semana as crianzas estiveron moi inquedas, notábase a chegada das vacacións, por iso fixeron un montón de actividades:

  • xogos de mesa en parella ou pequeno grupo
  • colorear debuxos de pascua
  • taller de abelorios e contas (pulseiras, colares, aneis, chaveiros…)

Pero sen dúbida algunha a estrela da semana foi o Taller de Pascua, no que nenas e nenos realizaron unhas cenorias de goma eva co seu correspondente coelliño de pascua; quedaron moi bonitas, e ademais levaban sorpresa!!

Boas vacacións dende  Madrugadores de Calo!!!

Desfrutade e ata a volta!!

COMEZAMOS ABRIL …

Ola unha semana máis familias! Finalizado marzo comezamos o mes de abril con moitas ganas pero algo cansos, sobre todo o grupo de nenas e nenos mais maiores centrados nos exames do segundo trimestre. Por este motivo buscamos unha semana de relax para as/os madrugadores de Calo.

Tanto o grupo de primaria como o grupo de infantil puido escoller actividade, e a maiores realizamos un taller de pulseiras, colgantes, chaveiros, colares… que sempre lles encanta!!

Non nos esquecemos de comentarvos que andamos xa cos preparativos do taller de pascua, un clásico no madrugadores, pero para saber o que estamos argallando teredes que agardar ata a vindeira noticia!!

Boa semana para todas e todos, saúdos

XOGANDO COAS EMOCIÓNS

Continuamos en Calo coas actividades centradas nas emocións, tan importantes no desenvolvemento das vosas crianzas. Tanto o grupo de primaria como o grupo de infantil, a parte destas actividades temáticas tivo tempo para desfrutar de momentos lúdicos con xogos, debuxos…

As distintas dinámicas realizadas foron un éxito, as nenas e os nenos de Calo implicáronse e divertíronse por igual. As actividades foron:

  • Mímica das emocións (colocados adhesivos de cores na fronte – explicar situacións con esa emoción – adiviñar de que emoción se trataba).
  • Xogo dos espellos (en parellas representar emocións; versión tamén lúdica).
  • Debuxo ditado (en parellas, buscamos que nenas e nenos aprendan a escoitar con atención, mellorar a súa atención e as súas habilidades comunicativas).

Nos vindeiros día continuaremos con máis xogos e actividades…

Boa semana familias, saúdos dende Calo!!!

SEMANA DO MAIS ESPECIAL …

Ola de novo familias!!, continuamos no Teo Madruga de Calo coas actividades temáticas deste mes de marzo, coas actividades lúdicas e con algunha que outra actividade especial para estes días.

Este mes de marzo está dedicado ás emocións, recoñecelas e aprender a xestionalas, fundamental para o correcto desenvolvemento das crianzas; na parte lúdica nenas e nenos continúan cos xogos, debuxos…e estes últimos días cunha actividade especial feita con plástico máxico, na que amosaron unha vez máis a súa creatividade.

Irémosvos contando as experiencias nas actividades como: debuxo ditado, xogo dos espellos, mímica das emocións…; non desvelamos mais polo momento, xa que agardamos que as crianzas tamén vos fagan partícipes das dinámicas que desenvolveremos.

Moi boa semana para todas e todos!!

CALO CO 8 DE MARZO

Despois de dúas xornadas de cole rematado o entroido, que en Calo centrouse nos xogos, comezamos unha nova semana centrada nesta ocasión no 8 de Marzo (Dia da Muller).  

No Teo Madruga de Calo dedicamos toda a semana a esta celebración, primeiro falamos do que era o 8M  e a súa orixe, para a continuación comezar a primeira das actividades: “Coñecendo ás monitoras”. Nelaas crianzas de primaria fixeron un montón de preguntas ás monitoras de Madruga (figuras femininas en contacto diario con elas e eles, das que puideron coñecer as súas historias, se sufriron algún tipo de desigualdade, ben nos seus estudos ou no seu traballo…etc.).

A segunda das actividades propostas foi “A muller da miña vida”, nenas e nenos debuxaron a muller máis importante para elas e eles, debendo facer tamén unha pequena descrición das mesmas (en canto a personalidade e forma de ser). Finalizamos a actividade coa presentación das mulleres das crianzas de Calo a todo o grupo. Bravo a todas e todos!!

Un saúdo familias, boa semana para todas e todos!!

VIVA O ENTROIDO!!

Un saúdo familias! a semana que vimos de rematar centrouse soamente nun tema o Entroido, e as “estrelas” nesta ocasión foron os antifaces, detodas as formas e cores. Destacamos especialmente os feitos coas palmas das mans das vosas crianzas, amosando a creatividade das nenas e dos nenos de Calo. Parabéns nenas e nenos!!

Agora toca festexar o Entroido!! e desfrutar duns poucos días de vacacións para recargar baterías.

Feliz Entroido para todas e todos!!

MÚSICA DE “BANJO” E SAN VALENTÍN

Ola de novo familias!! Continuamos esta semana coa música, e nesta ocasión coñecendo un instrumento totalmente descoñecido para as crianzas, o “banjo”. O primeiro foi velo (lamentablemente so en fotografía) e logo escoitar o seu son e música. Este instrumento, orixinario dos Estados Unidos pronto se converteu no instrumento musical por excelencia da música tradicional estadounidense.

Finalizamos esta actividade cun obradoiro no que creamos un “mini banjo”; como materiais usamos: tapas de tarros de cristal, gomas de cores, paus de xeado, cinta de pegar e cintas de papel de cores para decorar. O resultado resumímolo nunha palabra “entusiasmados”.

Xa que esta semana tamén se celebrou o San Valentín, deixámonos levar polo corazón… e as crianzas do Madruga de Calo fixeron uns adornos ou marcapáxinas con goma eva de purpurina e paus de xeado. Quedaron moi bonitos, xa que deixaron voar a súa imaxinación!!

Tivemos ao longo destes días, xa que a situación vai mellor,  tempo tamén para o xogo individual e para pintar. En Calo temos un montón de artistas!!

Un saúdo dende Madrugadores, boa semana para todas e todos!!

XOGOS MUSICAIS

A música foi a protagonista do Madruga de Calo ao longo desta semana. Para seguir cos protocolos Covid optamos por facer diferentes xogos relacionados coa música que as crianzas puideron seguir dende o seu sitio.

O primeiro dos xogos foi “Adiviña a canción”, nel tiñan tres pistas: emojis sobre o título, tarareo da canción e pista escrita, coas que adiviñar o título da canción. A implicación de todas/os foi boa, aínda que os resultados foron moi dispares.

O segundo dos xogos foi o “Bingo musical” (usamos o clásico xogo de bingo) e nel, as crianzas que tivesen o número cantado tiñan que tararear unha canción ou pagar prenda (contar chiste ou adiviña). Dicirvos que poucas/os se atreveron coas cancións, pero encantadísimos contaron chistes e adiviñas, que lle imos a facer!!!

Completamos a semana con xogos, debuxos e cun “Adiviña a peli infantil”, que tamén lles entusiasmou, e que atopamos por casualidade.

Boa semana para todas e todos!!

Coidádevos!!

DE VOLTA Á RUTINA!!

Esta semana recuperamos a normalidade no Madrugadores de Calo, case xa sen ausencias, puidemos recuperar unha das actividades lúdicas, o xogo con xoguetes e xogos.

En canto á programación as crianzas de primaria compartiron as súas historias creativas co resto de compañeiros e compañeiras, actividade na que as crianzas de infantil pasaron un moi bo rato.

Xa neste mes de febreiro tocan como actividades temáticas a música e o entroido, agardamos con moita ilusión que lles gusten, xa vos contaremos!.

Dende Madruga de Calo moitas grazas, moito sentidiño e moi boa semana familias!!

A IMPORTANCIA DUN MUNDO EN PAZ

Continuamos unha semana mais coas actividades do Teo Madruga de Calo, e tal como vos contamos na anterior noticia, esta semana as crianzas estiveron moi concentradas creando pequenas historias a través de imaxes.

Mentres as/os maiores crearon as imaxes de dúas cancións infantís moi coñecidas, as/os máis pequenas/os, cunha pequena axuda (tira de papel con personaxe, problema e escenario) tiveron que crear unha historia en imaxes. Os resultados foron moi satisfactorios, a ver como saen as representacións!! Xa vos contaremos.

Finalizamos a semana coa celebración do día escolar da non violencia e a Paz, que cada ano se celebra o 30 de xaneiro. En pequenos grupos, sempre con distancia ou individualmente, as crianzas puideron debuxar nun folio como representarían a Paz, provocando a seguinte reflexión “que importante é vivir nun mundo en Paz”.

Un saúdo familias!! que teñades unha boa semana.

CREANDO HISTORIAS

Ola familias!!, continuamos unha semana máis en Calo con moito coidado pola pandemia e preparando a nova actividade semanal. As crianzas usarán toda a súa creatividade para crear pequenas historias que representarán como se fosen obras de teatro.

Imos con calma xa que as circunstancias da pandemia en Calo estannos a obrigar, pero xa prontiño veremos todos os resultados. A semana completámola coa visualización dunha película de aventuras que pon en valor a amizade.

Un saúdo a todas e todos!! E coidádevos.

DE VOLTA DAS VACACIÓNS…

Ola de novo familias, e antes de nada Feliz ano!!; estamos xa de volta das vacacións de Nadal e estes primeiros días no Madruga de Calo imos con calma. A pandemia volve a poñernos en alerta, polo que estamos a extremar todas as medidas de prevención e a intensificar as actividades individuais.

Para esta primeira semana non lle complicamos ás crianzas a volta á clase, así que optamos toda a semana polos xogos de mesa e os debuxos. Pero xa andamos a artellar as vindeiras actividades que vos anticipamos que serán moi teatrais.

Ata a vindeira semana e un saúdo para todas e todos!!

BENVIDAS VACACIÓNS!!

Ola familias!! a piques de iniciar as vacacións das crianzas de Teo Madruga, rematamos as actividades destes días coa ilusión das nenas e dos nenos polo Nadal.

Nesta semana os diferentes grupos foron finalizando os calcetíns de Nadal, e comezaron a decorar unhas  coroas súper chulas de goma eva de purpurina con adornos como copos de neve, estrelas, Papá Noel, renos … de cores desta época como o vermello, verde e prateado.

A maiores fixemos unhas árbores de nadal que as crianzas decoraron con rotuladores de cores, e que ocultarán unha pequena sorpresa doce como broche final deste trimestre.

Dende Madrugadores de Calo, moitas gracias a todas e todos, desfrutade  destas vacacións e vémonos á volta!!.

Un saúdo!

Felices festas e Feliz ano novo!

NADAL, NADAL !!

Boas familias!!

A pesar de ser máis curta, esta semana que acabamos de finalizar, seguimos coas actividades de Nadal no Madruga de Calo. Estes días tocou decorar os calcetíns de Nadal, así que, pinturas 3D e purpurinas foron os elementos máis usados polas crianzas.

Rematamos a semana comezando a ver a peli de Nadal: “David e os Elfos”, que alternaremos co resto de actividades, e que parece que lles está a gustar bastante, xa vos contaremos!

Boa semana para todas e todos.

Saúdos dende Calo!!

PREPARANDO XA O NADAL…

Ola de novo familias!!

Acabamos o mes de novembro, mes por excelencia do Samaín, que en Madruga dedicámolo á Arte, e damos a benvida a decembro, mes do Nadal e unha das festas favoritas das crianzas; por tal motivo, como cada ano, comezamos xa coas actividades especiais deste mes.

Na primeira actividade nenas e nenos están a realizar un Calcetín de Nadal;  tras elaborar as monitoras as diferentes plantillas, tocou calcar sobre feltro de cores diferentes, moitísima concentración, parabéns a todas e todos. Xa sabedes que teredes que agardar polo resultado…seguro que fantástico!

Completamos a nosa semana con moito xogo, e con algún que outro repaso das normas Covid, que ás veces as crianzas despístanse.

Que teñades unha boa semana, saúdos!!

UN MUNDO VIOLETA

Ola de novo familias!!, como xa sabedes esta semana foi o 25 de novembro, día internacional contra a violencia de xénero, e en Teo Madruga Calo fixemos unha serie de láminas para reivindicar este feito.

As crianzas de infantil  e as crianzas de primaria fixeron a mesma actividade, nesta tiñan que pintar as mans de violeta, a cor da loita feminista, e poñelas nunha cartolina, hai que ver que variedade de mans temos en madruga!! Despois decoraron esta lámina poñendo 25N e tamén, as crianzas de primaria mais maiores, un slogan, algúns deles alucinantes!!

Para rematar a semana, ademais da actividade do 25N fixemos un porta velas, modelando pasta Das déronlle unha forma redondeada, puxeron unha vela no medio e a decorar!! Quedaron moi orixinais e coloridos.

Dende Madrugadores Calo, moitas grazas familias tedes unhas crianzas estupendas!!

Boa semana para todas e todos!!!

VALORES E EMOCIÓNS

Esta semana fixemos un parón na Arte para comezar a traballar sobre a programación deste curso dedicada aos valores e ás emocións, importantes para o desenvolvemento e o benestar das crianzas.

Coas nenas e cos nenos de infantil estivemos falando das seguintes emocións: alegría, tristeza, medo e ira; para facelo máis visual fixemos unhas caras con cada unha das emocións, caras que tiveron que colorear para identificar o que serían emocións positivas ou negativas (no que nos centraremos ao longo do curso coas crianzas de infantil será o recoñecemento de cada emoción e aprender a xestionala).

Nenas e nenos de primaria realizaron unha dinámica de grupo “O abanico” co obxectivo de fomentara autoestima e mellorar a cohesión do propio grupo. Na actividade cada nena e neno puxo o seu nome na parte de arriba dun folio en branco, cada folio foi pasando polos compañeiros e compañeiras para que escribiran nel tres aspectos positivos do dono ou da dona do papel, a continuación dobrábase en abanico tapando o escrito, e pasábase ao seguinte compañeiro; finalmente o folio chegou ao seu dono ou dona que o leu, ben en privado ou en alto, para o resto de compañeiros/as (segundo a súa elección).

A semana completámola con xogos e rematando actividades pendentes de finalizar.

Boa semana familias !!!

SEGUIMOS COA ARTE

Ola de novo familias!!, como xa sabedes este mes estamos dedicando o Teo Madruga á Arte e, co exemplo das grandes obras que fixeron a pasada semana, esta continuamos pero aumentando o nivel de dificultade.

As crianzas de infantil practicaron a técnica do «dripping«, que consiste en mollar un pouco o papel e deixar caer unhas pequenas gotas de pintura, a continuación móvese o papel ou cartolina na dirección que se queira, e observar como co movemento vaise deslizando a pintura, mesturando as cores, creando outras novas… nunha palabra fascinante!!

Namentres as crianzas de primaria experimentaron co puntillismo, técnica pictórica que consiste na creación de pequenos puntos de cores que combinados crean imaxes cromáticas. Como artista referente escollemos a Georges Seurat, e a súa obra “La Torre Eiffel” (1889),un cadro de pequenas dimensións que amosa a Torre Eiffel neses momentos en construción (sen o último piso).Primeiro realizaron un debuxo – bosquexo da Torre, e a continuación con rotuladores foron pintando con puntos o seu debuxo.

Como comentario final dicirvos que no Madruga de Calo temos un montón de artistas!!, a ver o desafío da vindeira semana!!.

Boa semana para todas e todos!!!

ADENTRÁNDONOS NO MUNDO DA ARTE

Bo día familias!!, benvidas unha semana mais ás noticias do Teo Madruga.

Despois dunha fin de semana de medo e sustos polo Samaín, comezamos un novo mes en madrugadores dedicado á Arte.

Nesta semana as vosas crianzas traballaron coma verdadeiros artistas, os de primaria exploraron a técnica do garabato, que consiste en deixar o lapis moverse polo folio creando formas moi diversas que colorearon con posterioridade, conseguimos así imaxes súper chulas nos folios.

Por outra banda, os de infantil fixeron un autorretrato inspirándose na obra de Paul Klee (debuxáronse a si mesmos nun folio con cadrados coloreados con anterioridade por eles).

Rematamos a semana cunha actividade cooperativa; as crianzas de sexto de primaria axudaron, con moito tino, aos/ás mais pequenos/as a facer pulseiras personalizadas, actividade que lles fixo especial ilusión.

Dende Madrugadores Calo un saúdo e ata a vindeira noticia!

SAMAÍN EN CALO

Ola de novo familias! Como non podía ser doutro xeito esta semana as crianzas de Calo centráronse no Samaín, unha celebración que tanto divirte como asusta aos vosos nenos e ás vosas nenas. Así que estes días estivemos rodeados de morcegos, teas de araña, cabazas, esqueletos… e infinidade de debuxos que nos introduciron completamente nesta celebración.

A parte das actividades de Samaín, e coma cada semana, nenas e nenos tiveron tempo para xogar e divertirse dende primeira hora da mañá. Boa semana para todas e todos!!!

EN CALO CREAMOS O NOSO PROPIO XOGUETE

Ola familias! Nesta semana pouco tempo tivemos para xogar, xa que estivemos a crear os nosos propios xogos. As crianzas máis pequenas pintaron tubos de papel, que se converterán en casiñas con diferentes puntuacións nas que meter unha pequena bola (xogo de habilidade).

Por outra banda, nenos e nenas de primaria estiveron a elaborar un xogo algo máis complexo, unha canastra de baloncesto (calcar e pintar as diferentes pezas, recortalas e elaborar os complementos do xogos)… seguro que lles vai a quedar moi ben. 

A semana completámola xogando cos xogos de mesa e os/as maiores rematando os colgantes das mochilas.

Como sabedes para a semana xa chega o SAMAÍN, e para saber o que faremos teredes que esperar un pouco máis. Que andaremos a argallar en Calo?

Boa semana familias!!! ata a vindeira noticia.

BENVIDOS E BENVIDAS AO TEO MADRUGA DE CALO

Benvidas familias!!, hai unhas semanas que iniciamos o novo curso, e no madrugadores de Calo, xa ao completo coas novas incorporacións de infantil, non paramos. Ao longo destes días as crianzas entretivéronse cunha das súas actividades favoritas, os xogos de mesa (Dobble, catro en raia, quen é quen?, Unno, virus, memory, xogo de pesca…etc.) que centraron os momentos de diversión da primeira hora da mañá.

Ademais dos xogos, individualmente nenas e nenos tiveron oportunidade de facer diferentes pulseiras (contas, letras e gomas de cores) e adornos cos seus nomes para as mochilas.

Comentarvos que a partir da vindeira semana iredes recibindo información sobre as diferentes actividades do Teo Madruga de Calo. Como cada curso iremos desenvolvendo coas vosas crianzas un proxecto lúdico-educativo que, este ano co nome de “ImaxinAcción”, centrarase en fomentar a creatividade e a educación en valores a través da proposta de diferentes accións.

De novo benvidas! e benvidos!, e grazas pola vosa confianza. 

Un saúdo, e boa semana para todas e todos!!.