Madrugadorxs Pontecesures

Aínda que foi unha primeira semana bastante curta, foi moi ben aproveitada polos e polas madrugadoras de Pontecesures.

Como non podía ser doutra forma, comezamos a semana poñéndonos ao día. Esta cativada portouse moi ben, e tanto Papá Noel como os Reis Magos deixaron moitos regalos debaixo das súas árbores. Non nos cabía a menor dúbida de que así sería despois do moito que se esforzaron neste comezo de curso.

Despois destas semanas sen verse, aproveitaron estes primeiros días para xogar xuntos de novo; circuítos de axilidade e creados por eles mesmos, o mikado ou o rummikub foron algún dos entretementos desta primeira semana de volta ás clases.

Dende logo, que neste Nadal, aproveitaron para cargar as pilas e seguir con moita enerxía.

Deixamos atrás outra semana no madruga de Pontecesures, e faise notable que os exames se van acabando e os nosos e as nosas madrugadoras teñen máis tempo para xogar e decorar a aula.

Liberamos o estrés destes días pintando algún monicreque de Nadal e que usamos como decoración na aula. Cada vez nótase máis o Nadal e ten máis colorido a aula dos madrugadores.

Tamén tiveron tempo para xogar á busca de tesouros por equipos; organizaron a súa estratexia, fixeron os seus plans e atoparon os mellores lugares para agochar os seus respectivos tesouros.

Como vedes unhas mañás moi ben aproveitadas e moi entretidas.

Vamos a pola última semana do trimestre cativos e cativas!

Comezamos a semana rematando a árbore que vai decorar a nosa aula de madrugadores, cada un dos e das madrugadoras colaborou para que a árbore quedase espectacular.

Rematada a decoración da árbore, pegamos todos os anacos e colocamos o resultado final nunha das paredes da aula.

Cada vez nótase máis que se achega o final do trimestre e os momentos de repaso e estudo da cativada máis madrugadora de Pontecesures son cada vez máis, sempre mostrándose dispostos e dispostas a axudar aos seus compañeiros e compañeiras.

Entre tanto repaso e estudo aínda quedou tempo para relaxarse con outras manualidades, esta vez estamos pintando os nosos propios monicreques de Nadal. Elfos e elfas, bonecos de neve, renos e Papá Noel comezan a aparecer no madruga de Pontecesures. Ademais, estamos preparando o noso propio nacemento.

Tamén tiveron momentos para xogar aos mestres e ao mesmo tempo aproveitaban para repasar para eses exames tan presentes estes días.

A seguir así madrugadores e madrugadoras!

Remátase novembro cunha semana do máis variada. Comezamos co 25N, día internacional da eliminación da violencia contra as mulleres, e aproveitamos para poñer en común as ideas e opinións dos nosos madrugadores e das nosas madrugadoras sobre as accións que se levan a cabo este día, da necesidade de que se realicen, do que ven ao seu arredor, comportamentos de compañeiros e compañeiras e a súa opinión ao respecto. Dende logo unha charla do máis amena e moi esperanzadora.

Tamén tiveron tempo de xogo e esta semana o absoluto protagonista foi xogar ás mestras. Repasaron matemáticas, as linguas, ata tiveron plástica e tempo de recreo. Dende logo son unhas mestras ben organizadas… e moi esixentes.

Para o final da semana, comezouse a sentir o espírito do Nadal e comezamos a preparar as decoracións para a aula das madrugadoras e dos madrugadores. Vai quedar impresionante!

Continuamos unha semana máis cos nosos e coas nosas madrugadoras, que a pesar de que o curso avanza e cada vez teñen máis exames, seguen coa mesma enerxía que a comezos de curso.

Entre os momentos de repaso, cada vez máis frecuentes, sempre logramos ter un momento de diversión entre todos os participantes do servizo de madrugadores de Pontecesures. Esta semana que deixamos atrás aproveitamos para xogar ao “Pictionary”, ao “Aforcado” e incluso ás agochadas ou ao pilla-pilla (na versión do madruga só se pode camiñar, non poden correr, se pillan a un compañeiro correndo non vale; fixeron un gran esforzo por conter toda esa enerxía e controlar as ganas de correr).

Tamén apareceu en escena o “Mikado” un xogo no que a habilidade e a paciencia son claves para facerse coa vitoria xa que teñen que ir sacando os pauciños de un en un e sen mover os demais.

Tamén tivemos unhas pequenas artistas que pintaron cadanseu unicornio, cada un único e fermoso.

Como vedes as nosas semanas son sempre moi entretidas e nestas vindeiras semanas non vai a ser menos pois agárdannos unhas semanas cheas de actividades relacionadas co Nadal.

Continuamos con enerxía outra semana máis cos nosos e coas nosas madrugadoras en Pontecesures. Coma sempre no madruga de Pontecesures aproveitase moi ben o tempo, esta cativada atopa momentos para xogar, repasar, debuxar, facer manualidades, etc.

Nesta semana que deixamos atrás os grandes protagonistas foron os xogos de mesa e o  xogo do aforcado, permitíndolles aos participantes do madruga o xogo grupal, ademais de traballar a lóxica, o léxico e a gramática.

Entre tanto xogo tamén houbo momentos para a lectura ou o debuxo.

Seguro que a vindeira semana se aproveita igual de ben que esta que deixamos atrás.

Despois dunha semana un tanto fóra do normal, marcada pola celebración do Samaín e bastante curta, o que non quere dicir desaproveitada xa que os nosos e as nosas madrugadoras aproveitaron para contarnos os disfraces e as historias de anos anteriores e anticiparnos un  pouquiño das disfraces tan terroríficas que ían a lucir esta vez vampiros, bruxas, cabaciñas, demos e zombis de distinta clase foron as estrelas do día.

Despois dun descanso ben merecido despois de tanta mostra de creatividade, encaramos  unha nova semana na que os rapaces e as rapazas aproveitaron para facer uso da maña e creatividade creando unha casiña cos elementos dos que dispoñemos como mesas, alfombras e coxíns, con moita imaxinación e, sobre todo, moita colaboración por parte de todos crearon unha casiña na que se podía xogar a xogos de mesa ou ler. Cada día sufría modificacións e ampliacións pois o que empezou sendo a idea dun par de madrugadores convertiuse nunha actividade para todos e todas. Con dicirvos que ata fixeron estanterías para organizar a casiña por dentro, xa vos facedes unha idea do ben que o pasaron.

Non faltou o tempo para repasar para os exames.

E para manter esta enerxía e que lles dure toda a mañá nada mellor que un bo almorzo, no que non pode faltar un bo tazón de leite e froita, así como galletas, cereais ou torradas con marmelada. Sempre equilibrado, pero variado ao longo da semana.

Vamos a por outra semana!

As e os madrugadores de Pontecesures estiveron esta semana que deixamos atrás preparándose para o Samaín. Entre momentos de diversión e piques, gozando de xogos de mesa en equipo e coñecendo xogos tradicionais, tamén tivemos unhas boas sesións traballando unha faceta máis artística, pitando e personalizando debuxos de cabaciñas de Samaín.

A través dunha actividade tan sinxela traballamos a concentración, a relaxación e a creatividade, ademais de compartir bos momentos en grupo foméntamos a colaboración entre os compañeiros e compañeiras.

Tamén houbo momentos de repaso de distintas materias, estudar con compañía e máis entretido e axúdanse mutuamente.

Para levar a cabo todo este traballo non pode faltar un bo almorzo para que os madrugadores e as madrugadoras collan as forzas necesarias para unha xornada escolar de moito éxito.

Continuamos cara unha nova semana que, de seguro, traerá cousas interesantes e entretidas para este grupo tan enérxico.

Deixamos outra semana atrás e con ela momentos de xogos, estudo e manualidades.

Seguindo co espírito de Samaín as nosas e os nosos madrugadores aproveitaron para elaborar distintas manualidades como caretas ou siluetas de animais, aproveitando o cartón que nos quedaba dos almorzos (caixas do leite, cereais e galletas) deixaron voar a súa imaxinación e puxéronse mans á obra coas súas creacións.

Tamén tiveron ocasión de retomar os xogos de mesa que tanto lles gustan como o “Taco, gato, cabra, queso, pizza”, o “Uno” o descubrir xogos novos de estratexia como as “Cadeas triangulares”, xogo que ademais favorece o traballo da percepción espacial, anticipación e a planificación estratéxica. Todo un éxito!

Co paso das semanas os exames comezan a aparecer e as madrugadoras e os madrugadores de Pontecesures son moi aplicados e adícanlle tempo a repasar. Faise notar o bo compañeirismo estudando xuntos e axudándose entre sí. A seguir así!

Co inicio do curso 2024/2025, comezou tamén o servizo de Madrugadores do CPI de Pontecesures, materializando deste xeito unha vía para facilitar a conciliación, ofrecendo a posibilidade de que aquelas familias que o precisen poidan deixar ás súas crianzas no colexio dende as 07:30 ata o inicio da xornada escolar.

Neste servizo, ofértase a posibilidade de que aqueles e aquelas participantes que o desexen poidan almorzar connosco. Que mellor maneira de comezar o día máis que cun bo almorzo para ter as pilas ben cargadas para o resto do día? Leite, froita, galletas, cereais, torradas con marmelada… variedade e equilibrio para que a enerxía dure toda a xornada.

Despois de mes e medio de curso, podemos dicir sen medo a equivocarnos, que aos madrugadores e madrugadoras deste novo curso 2024/2025 sóbralles enerxía e entusiasmo.

Neste tempo que levamos, xa tivemos tempo de gozar de distintos xogos de mesa grupais, descubrir xogos tradicionais e algunha versión actualizada de xogos de toda a vida, estes rapaces e rapazas teñen moita imaxinación.  O Rumikubik, o Unánimo, o Uno e quebracabezas foron os favoritos do mes.

Conforme foron avanzando as semanas, foron aparecendo os primeiros exames e no grupo de Madrugadores son moi aplicados e aplicadas e aproveitaron o tempo para repasar o tema antes de enfrontarse ás preguntas dos e das profesoras.

As manualidades ocuparon outra gran parte destes momentos de inicio de curso, favorecendo a concentración e exercitando a imaxinación de todos. Limpiapipas, lentellas, vasos de plástico e papeis de cores inspiraron aos máis madrugadores do CPI de Pontecesures con xornadas de deseño de monstros, paisaxes marítimas ou de debuxo.

Outubro promete traer máis xornadas de creatividade e diversión por parte destes grandes artistas.