Madrugadorxs O Pino

Apenas quedan un par de semaniñas desta aventura da Escola de Verán de O Pino e as enerxías e as novas ideas da rapazada van en aumento. O tempo nestas últimas xornadas estivo moi ben aproveitado, con divertidas festas da auga que sempre veñen moi ben para combater o calor e botar unhas risadas, novos talleres artísticos e de reciclaxe onde nos sorprenderon con uns cadros moi creativos, unha fauna acuática do máis simpática e outros detalles decorativos cheos de cor. Ademais o grupo dos maiores tivo ocasión de gozar con unha actividade de “lettering” na Casa da Cultura, encantoulles poder traballar con este arte de debuxar letras, creando diseños únicos.

Seguimos coas novidades a próxima semana familias!

Nesta ocasión a cativada de O Pino tocoulle pasar unha xornada inmellorable na Area Recreativa do Río Barosa. Comezando o día cunha pequena ruta que nos fixo chegar as fervenzas fíxosenos necesario recargar pilas cunha boa comilona. Despois desta, a rapazada deleitounos cos seus mellores cantos e pasos de baile; son uns e unhas auténticos/as artistas!. Sen embargo, non nos faltou tempo para refrescarnos desfrutando dos tobogáns naturais das fervenzas e as súas pozas. Aquí tivemos unha visita moi especial… un morcego do lugar!!!

Foi unha xornada de moita adrenalina e algunha que outra cuada.

Agardámosvos na próxima familias!

Unha vez chegada a esta recta final, é momento de facer balance deste curso escolar.

En primeiro lugar, queríamos darlle as grazas ós nosos madrugadores e madrugadoras por darnos momentos de risa e alegría, incluso en intres nos que non era doado para nós. Así mesmo, por mostrarse sempre colaboradores/as ante as diversas propostas de actividades que lle propuxemos ó longo deste tempo.

Foi un verdadeiro pracer velos medrar ó noso carón, non sabemos o que nos deparará o futuro, de seguro quedámonos con todo o disfrutado xuntos/as este curso e, pola nosa parte, sería estupendo volver a coincidir.

Chegados a este punto só nos queda darvos as grazas por ter uns fillos/as marabillosos e marabillosas!

Celebramos o final desta etapa cunha gran festa de fin de madrugadores na que realizamos diferentes xogos como: carreiras de sacos, relevos con ovos, a momia…, sempre inculcando o cooperativismo entre o grupo.

Sin máis dilación, feliz verán e bo voo ✈️

Aínda que o tempo non nos acompaña, nós estamos seguras de que Lorenzo chegará en calquera momento, polo que seguimos preparándonos para o noso particular verán.

Deste xeito, comezamos a semana realizando unhas limoadas e laranxadas ben apetitosas co afán de promover entre os nosos madrugadores e madrugadoras hábitos de vida saudables.

Unha vez hidratados/as, xa estamos listos e listas para o chapuzón e para iso fixemos unhas fantásticas gafas de buceo coas que se ve incrible o fondo mariño, tal e como podedes  ver na nosa galería de fotos.

Pero, ¿que é un verán sen música? Por iso realizamos un furor no que todos e todas cantaruxamos varias das nosas cancións favoritas e, tras unha axustada competición, declaramos o empate entre os diferentes equipos.

Agardamos que nos sigades acompañando nesta aventura que xa está por chegar ao seu fin. Estamos cun sentimento agridoce preparando a nosa festa de fin de curso. Vémonos familias!

Coa chegada do bo tempo e descontando os días para as vacacións de verán os madrugadores e madrugadoras xa comezaron a elaborar o seu kit básico de verán para desfrutar do mesmo.

Así, esta semana realizamos unha chancleta moi personalizada, tanto en tamaño como en deseño. Para isto, a cativada tivo que estampar a planta do seu pé nunha cartolina. As risas estiveron garantidas e puidemos comprobar que uns aguantan as cóxegas mellor ca outros.

Complementariamente gañou relevancia, unha semana máis, o xogo por recantos, sendo os protagonistas o recanto de construción e o recanto de debuxo.

Estade moi atentos e atentas porque isto tan só é o inicio do noso kit de verán!

A semana pasada realizamos un taller sobre a diversidade no que cada madrugador e madrugadora realizou a súa propia bolboreta de cores. Así, pretendíamos visualizar que a pesar de todos contar cos mesmos materiais cada resultado foi distinto. Para isto a cativada empregou múltiples cores e técnica do estampado. Agardamos que vos guste moito o resultado que podedes ver na nosa páxina web.

Complementariamente a este lado creativo e poñendo en práctica o noso lado máis lúdico realizamos unha serie de xogos que tiveron unha moi boa acollida entre a rapazada. Entre eles, destacamos unha versión innovadora do xogo das sillas para o cal utilizamos unha baralla de cartas española.

Unha vez iniciado xuño xa se fai notar o verán e con esta temática enfocaremos as próximas actividades.

Vémonos prontiño!

Tras unhas duras semanas de traballo, decidimos priorizar o espírito lúdico realizando unha serie de xogos ao longo da semana que fomentaban, ademais da diversión, a cooperación entre os nenos e nenas.

Sen dúbida un dos que máis gustou foi o “Busca minas”, onde os madrugadores e madrugadoras debían evitar os chanzos incorrectos para superar a proba.

Vendo o éxito deste primeiro xogo, puxémolos a proba co xogo de “Terra e auga” no que a cativada tiña que atopar o camiño de terra correcto sen pisar a auga.

Así mesmo, esta semana os aros foron protagonistas, levando a cabo diversas actividades con eles para traballar diferentes habilidades motrices.

Para rematar a semana e potenciando valores como o compañeirismo, xogamos ao “Brilé circular”.

Sen dúbida, foi unha semana chea de diversión e alegría.

Un saúdo, familias!

Con motivo do Día das Letras Galegas esta semana foi adicada á nosa lingua e a actividades relacionadas coa mesma. Previamente, adicamos un tempo a reflexionar cos madrugadores e madrugadoras a importancia deste día e a recoller os datos máis importantes da homenaxeada deste ano: Luísa Villalta.

Entre as actividades realizadas, destacamos a recreación da figura da autora que se atopa exposta na aula.

Outra das actividades a destacar é a recopilación das palabras galegas favoritas da cativada. Entre estas podemos atopar: colo, meiga, meixela, aperta, bico, toxo…

Así mesmo, non deixamos de lembrar o Día Internacional das Familias celebrado o 15 de maio. Tendo en conta que cada familia é única e especial, e tomando como referencia o conto “Un puñado de botones”, abordamos cos nenos e nenas a diversidade familiar, xa que hai numerosas realidades que poden existir baixo o concepto de familia.

Posteriormente cada neno e nena fixo un retrato da súa familia que agardamos luzan ben bonitas nas vosas casas.

Ánimo nesta recta final, familias!

A pesar de que esta semana foi moi curta os madrugadores e madrugadoras puxéronse mans á obra dando por concluído este número especial do xornal “A voz de madrugadores”.

Dito xornal comeza coa sección  de Educación na que a cativada conta os nervios a flor de pel fronte aos últimos exames e ao remate do curso escolar agardando ansiosos e ansiosas as vacacións de verán.

En canto á sección de Cultura, os nenos e nenas relatan as últimas saídas do curso escolar e o ben que o pasaron nelas.

No que respecta á sección de Sociedade, o protagonismo é para Sogama, que da man de Cristina colaborou na concienciación do alumnado do CPI na importancia da reciclaxe.

Por outro lado, na sección de Deportes os madrugadores e madrugadoras fálannos dunha animada competición ao cachirulo entre os diferentes cursos de educación primaria, facendo fincapé na diversión e deportividade.

Na sección do Tempo, por moito que vos contemos, nada o resume mellor que o famoso dito “Nunca choveu que non escampase” . De todos xeitos, podedes consultar a predición completa no noso taboleiro de anuncios.

E como todo bo xornal, os Pasatempos, os Chistes e os Anuncios, non podían faltar. Aconsellámosvos botarlle unha ollada a estas seccións porque a verdade é que non teñen desperdicio.

Por último, destacar que este xornal non sería o mesmo sin as súas ilustracións coas que os madrugadores e madrugadoras demostran, unha vez máis, que son uns/unhas artistas.

Esta semana o mundo do xornalismo invadiu a aula de madrugadores e madrugadoras. Ante a importancia das novas de actualidade, decidimos crear un xornal para darlle a coñecer a cativada a importancia deste recurso na nosa vida cotiá.

O primeiro que fixemos foi reunir o alumnado nunha asemblea para determinar os coñecementos previos dos nenos e nenas e indagar en maior medida sobre o xornal e a súa relevancia. Posteriormente realizamos unha choiva de ideas para determinar o nome do noso xornal nacendo así “A voz de madrugadores”.  De seguido creamos diferentes equipos que se encargan das seccións do noso xornal: educación, cultura, sociedade, deportes, tempo, pasatempos, chistes e anuncios.

Estamos traballando arreo para poder compartir con vós o noso xornal!

Deica  a semana familias!

Con motivo do día do libro que tivo lugar o pasado martes realizamos unha serie de actividades o longo da semana para conmemorar dito día, espertar o interese pola lectura e fomentar o hábito lector entre os madrugadores e madrugadoras.

Unha das actividades realizadas foi un obradoiro de marcapáxinas que agardamos luzan ben bonitos entre os vosos libros favoritos.

Así mesmo, creamos un gran libro no que recollemos algunha das frases dos libros favoritos da cativada. Entre as que se atopa “Solo con el corazón se puede ver bien; Lo esencial es invisible a los ojos” do Principito.

Colectivamente levamos a cabo un contacontos empregando para isto a obra de José Campanari e Jesús Cisneros “E que podo facer eu?”, recurso facilitado pola biblioteca do CPI Camiño de Santiago. Así mesmo, dita lectura serviunos como base para unha posterior representación onde a imaxinación, a improvisación e a creatividade foron as protagonistas.

Feliz Semana do Libro para todos e todas!

Retomando a tarefa da semana pasada, estes días puxémonos mans a obra co deseño e coidado de Turbulencia ( a nosa mascota de madrugadores). Así os madrugadores e madrugadoras debuxárona, recortárona, pintárona e decorárona o seu gusto.

Transcurrindo a semana levamos a cabo unha xornada de xogos tradicionais dando a coñecer, entre outros , os bolos ou o tres en raia. Nestes, a cativada mostrou unha gran implicación e un pouquiño de competitividade.

Centrándonos máis na actualidade, realizamos diversos xogos como o das casas de tres, quen é o máis rápido, mímica, memory…

Estade moi atentos/as que veñen novidade.

Ata a  próxima!

Tendo en conta as peticións dos nosos/as madrugadores e madrugadoras, esta semana démoslle a benvida á nosa mascota.

A pesar da indecisión inicial por elixir esta, realizamos unha reñida votación entre as diferentes aportacións da cativada entre as que se atopaban: coello, araña, can, vaca… Finalmente, a opción gañadora foi: o lagarto.

Unha vez que a elección estaba clara puxémonos mans á obra para darlle forma ó noso réptil madrugador. Para isto, axudámonos de diferentes materiais reciclados e, sobre todo, da imaxinación e creatividade dos nosos nenos e nenas.

Mentres o lagarto vai collendo forma eliximos conxuntamente o seu nome: Turbulencia, como vedes, é un nome ben orixinal!

Estade moi atentos e atentas porque Turbulencia seguirá facéndose notar e poderédela coñecer a vindeira semana.

Entre pincelada e pincelada levamos a cabo a realización de diferentes xogos como o pobo durme e director de orquestra.

Agardamos que desfrutarades do sol!

Ata a  próxima.

Tras unha semaniña de descanso xa estamos de volta coa enerxía a tope. Por petición popular dos madrugadores e madrugadoras iniciamos esta nova andaina realizando a preparación e execucións duns ovos saltóns.

Sacando o noso lado máis lúdico fixemos diferentes xogos ó longo da semana entre os que destacamos “ordeando a nosa baralla”, un xogo que non deixa de fomentar o traballo en equipo e a cooperación permitíndonos traballar valores fundamentais na cativada como o respecto, a solidariedade, o compañeirismo…

Pero sen dúbida, o xogo estrela foi “o ladrón/ladroa de colas” onde a rivalidade pasou a un segundo plano deixando paso a un momento de lecer e diversión.

Tamén tivemos tempo para poñernos ó día e contarnos todas as aventuras de Semana Santa.

Vamos pola recta final!

Tras un longo período de traballo por fin chegan as ansiadas vacacións de Semana Santa, pero antes de irnos non queremos deixar de contarvos as actividades que fixemos esta semana.

Comezamos a semana deseñando os nosos peculiares coellos de Pascua que serviron de soporte para o noso posterior taller floral. Cada neno e nena doulle cor o seu coelliño decorándoo con flores de mooooitas cores. Os resultados son ben vistosos, non deixedes de velos na nosa galería.

Pero… que é unha Pascua sen ovo? Por iso, a aula de madrugadores/as converteuse nun enorme niño no que naceron un montón de poliños.

Para rematar a semana e sacando o noso lado máis larpeiro levamos a cabo unha búsqueda do tesouro na que os protagonistas foron os ovos de chocolate, a pesar de que o reto era complicado, os madrugadores/as resolvérono a perfección.

Descansade e desfrutade a partes iguais, familias.

Vémonos na recta final!

Nos días previos e con motivo do Día Internacional da Muller realizamos cos nosos madrugadores e madrugadoras unha asemblea para coñecer a importancia deste día e a relevancia dos logros acadados no que o ámbito da igualdade se refire.

Para conmemorar este día levamos a cabo un obradoiro no que realizamos unha figura representativa do 8M con papel maché.

Así mesmo, non nos faltou tempo para elaborar un mural no que cada neno e nena aportou unha mensaxe do que para el/ela significaba este día.

Por outro lado, esta semana executamos diferentes xogos e dinámicas como paquete-paquete, quen é quen, circuítos, relevos…

Vamos familias, un último esforzo que xa se ven as vacacións!

Un saúdo.

Na aula de madrugadores e madrugadoras non nos esquecemos da relevancia da ciencia, e concretamente da importancia de recoñecer o papel fundamental que desempeñan as mulleres e as nenas nela. Por iso, e tendo presente que o anterior 11 de febreiro foi o Día Internacional da Muller e a Nena na Ciencia levamos a cabo unha serie de experimentos ao longo da semana.

Co fin de transmitir esta importancia aos nenos e nenas realizamos unha asemblea no que cada un/unha nos aportou o seu punto de vista sobre a temática. Para entrar en materia comezamos cun experimento que poñía a proba a reacción da canela en contacto coa auga. Tamén quedamos abraiados e abraiadas ao ver como o poder do osíxeno impedía que un pano de mesa metido nun vaso non se mollara o somerxerse en auga.

Seguimos poñendo a proba o poder da auga comprobando que os debuxos que fixemos nun prato navegaban sen perder a súa forma ao botarlle auga.

Unha das experiencias que máis desfrutaron os madrugadores/as foi descubrir que ao introducir en auga un debuxo, pintado por eles, este perdía as súas cores recuperándoas ao saír á superficie.

Para poñer a guinda final á nosa semana da ciencia e en sintonía co tempo, realizamos unha nube de choiva de diversas cores que non deixou indiferente a ninguén. Así mesmo, ao longo destes días seguimos o proceso para obter un ovo saltón que podedes observar na nosa galería de fotos.

Como diría Miguel de Unamuno “la verdadera ciencia enseña, sobre todo, a dudar y a ser ignorante”.

Con motivo da celebración do día de Rosalía de Castro, esta semana na aula de madrugadores/as non faltou a presenza da poesía, de distintos autores/as da literatura galega e a reivindicación da nosa lingua.

Inicialmente realizamos unha asemblea cos nenos/as tratando de aproximalos á historia de Rosalía de Castro, a súa importancia cultural e a súa relevancia na loita pola lingua galega.

Xa sacando o seu lado máis creativo, os cativos e cativas sorprendéronnos cun fermoso estampado da silueta da autora que loce ben bonita cuns versos de Rosalía.

Rematando a semana, e cun fin máis lúdico, realizamos un particular concurso de poesía no que a cativada debía identificar a que autor/a pertencían poemas como: Canto ó idioma galego, Pra a Habana!, O reino ou Nao senlleira. Un reto máis que superado!

Para facer unha despedida acorde a esta semana dicirvos como diría Rosalía que “este vaise i aquel vaise, e todos, todos se van”.

Boa semana familias!

Esta semana o espírito lúdico invadiu a aula de madrugadores e madrugadoras. Así, co fin do Entroido demos cabida a unha serie de xogos que non deixaron indiferente a ninguén como: a bóla loca, a bomba, director de orquestra…

Agardamos que o Entroido vos servise para descansar e coller forzas, nós voltamos cun montón de ideas innovadoras que agardamos que sexan do voso agrado.

Vémonos pronto!

Como o Entroido xa está aquí e xa somos uns expertos e expertas nos diferentes personaxes do Entroido galego, quixemos converternos en peliqueiros e peliqueiras. Para iso, realizamos uns fermosos cadros nos que empregamos a técnica do estampado.

Para continuar coa celebración tivemos un taller de antefaces no que cada madrugador e madrugadora dou renda solta á súa imaxinación decorándoo como máis lle gustaba.

Ao longo da semana estivemos moi atentos e atentas aos mandadiños do Meco, cumprindo todos e cada un deles coma bos entroideiros que somos.

Para rematar a semana realizamos unha gran festa de Entroido co seu particular desfile de disfraces no que había minions, pitufos, abellas, ninjas… Nesta non faltaron xogos, música e mooooita diversión!

Un saúdo.

Para conmemorar o Día Escolar da non Violencia e da Paz, aproveitamos o traballo realizado no taller de modelaxe da semana pasada, para facer uns fermosos colares, os cales foron decorados polos madrugadores e madrugadoras empregando a técnica do puntillismo.

Nos días posteriores estivemos coñecendo figuras emblemáticas do Entroido de Galicia xa que nos parece importante achegar a nosa cativada ás tradicións galegas no que ao Entroido se refire. Así, démoslle entrada na aula de madrugadores/as aos peliqueiros, aos boteiros, ás pantallas e aos xerais da Ulla. Estes podédelos observar no noso orixinal mural creado polos nenos e nenas.

Ficade atentos e atentas familias, isto tan só é o principio do noso Entroido 2024!

Esta semana comezamos a falar cos madrugadores e madrugadoras da importancia dunha convivencia escolar pacífica  co motivo de que a vindeira semana se celebra o Día Escolar da non Violencia e da Paz

Para iso, fixemos unha asemblea para dialogar cos nenos e nenas e coñecer o que xa sabían sobre o tema. Chegaron á conclusión de que o acoso escolar é unha temática que é importante abordar e traballar entre todos e todas, creando un clima de convivencia, no que todos nos sintamos queridos/as e aceptados/as

Así, relacionamos este tema co ámbito musical rapeando “Se buscan valientes”

Para rematar a semana, realizamos un taller de modelaxe iniciando as actividades que realizaremos a vindeira semana para conmemorar dito día da paz.

Así mesmo, non nos esquecemos dos preparativos para o Entroido.

Vós estades listos e listas?

Preparándonos para o frío, comezamos a semana desafiando a nosa creatividade realizando un obradoiro con materiais de reciclaxe, dando vida a uns pingüíns que de seguro están a proba do frío que está por chegar.

Coa baixada das temperaturas non sabemos si chegará a neve a O Pino, pero á aula de madrugadores e madrugadoras xa chegou. Así realizamos un taller sensorial facendo a nosa propia neve coa que xogamos moito realizando bonecos de neve

Para rematar a semana, recuperamos algúns dos nosos xogos tradicionais, entre os que sen dúbida, o que máis éxito tivo foi saltar a corda.

Familias, non esquezades as bufandas que hai previsións de moito frío!

Un saúdo.

Despois dunhas semanas de desconexión estamos de volta coas pilas ben cargadas.

Para comezar o ano e retomando a rutina, tras poñernos o día das aventuras de Nadal, comezamos cun taller de papiroflexia realizando unha flores para encher de cor este ano 2024.

Así, para ter unha visión global do ano fixemos os nosos particulares calendarios que agardamos que vos axuden a non esquecer as vosas datas especiais.

Familias, esperamos que disfrutarades das festas. Nós volvemos a carga con novas ideas para este novo trimestre que vos iremos amosando por aquí nas vindeiras publicacións.

Estade moi atentos/as!

Un saudiño.

Non queríamos dar por concluída esta aventura sen contarvos todas as cousas que ocorreron esta semana.

O luns montamos a nosa árbore de Nadal. Os madrugadores e madrugadoras esforzáronse un montón na elección dos adornos. Tamén fixeron a súa particular bóla de neve para decorar as súas casas.

O martes fixemos un contacontos de Nadal co conto de “Cando a Matías lle entraron ganas de facer pis na noite de reis”. A verdade é que o disfrutamos un montón e ningún/a se puido resistir a cantar … o tren de Matías , chu chu chu, corre polas vías chucu chucu chuuu…

O mércores estreando o noso buzón real, enviamos as nosas peticións e desexos a Oriente. Agardamos que Melchor, Gaspar e Baltasar non se esquezan de nada a noite de reis. 

O xoves, día de moitas emocións, apareceron unha serie de pistas pola aula de madrugadores , estas axudáronnos a descifrar un código que servía de chave para abrir un cofre encadeado. Este contiña un agasallo para cada madrugador/a de parte do noso Elfo. Tamén había unha bonita carta de despedida na que nos asegurou que volvería para o ano. Canto o imos botar de menos…

E ata aquí o primeiro trimestre familias, desexarvos a todos/as unhas felices festas e un próspero ano novo.

Vémonos a volta! 

Entre trasnada e trasnada o noso Elfo ocorréronselle un montón de ideas de nadal para a nosa cativada.

Comezamos a semana elaborando uns veloces renos xa que como Papá Noel os seus renos precisa, nós fixemos uns que corren a toda presa. 

Superado o luns, puxemos a nosa cabeza a funcionar e tocounos adiviñar través dun entretido xogo de mímica. 

Seguindo coa semana os nosos/as madrugadores/as liña querían facer e non se deixaron vencer. Efectivamente, tamén houbo tempo para un bingo de nadal.

E para non parar de rir un chiste tivemos que dicir celebrando un concurso de chistes no que saíron algúns moi orixinais. 

Rematando a semana rodada, roda rodiña a túa figuriña. Dándolle unha dobre vida os tapóns reciclados e para que todos tivéramos un recordo do noso Elfiño nas nosas casas, elaboramos un ben curioso. 

Atención familias! Chegáronnos noticias de que o Elfo non só está facendo trasnadas na escola se non tamén nas casas… Andade con ollo!  

Unha aperta.

Aínda que a semana pasada se nos fixo un pouco curta, o noso Elfo sorprendeunos con diferentes actividades. Así, rematamos as nosas letras de Nadal que seguro quedarán ben bonitas decorando as vosas árbores.

Tamén fixemos un divertido concurso de panxoliñas, no que os nosos madrugadores e madrugadoras son uns expertos/as e como consecuencia rematou en empate.

Como o bonito destas datas é compartilas, os nenos/as deseñaron unhas postais chulísimas para sorprender as súas familias transmitíndolle os seus mellores desexos.

Sigamos deixándonos contaxiar polo espírito de Nadal, familias!

Un saudiño.

Esta semana sorprendeunos na aula de madrugadores un repartidor que traia un paquete moi especial.

Cando o abrimos non dou indiferente ninguén, era un dos elfos de Papá Noel que viña directo do Polo Norte para traernos risas, diversión e moitas trasnadas.

Tal e como nos dicía na carta de presentación vainos acompañar o longo deste mes de decembro propoñéndonos actividades chulísimas e dándonos algunha que outra sorpresa.

Tedes xa preparada a árbore de Nadal familias?

Unha aperta!

Como vos comentábamos a semana pasada, nestes días puxemos a proba a nosa vea máis artística realizando diferentes actividades. 

Así, comezamos elaborando uns orixinais pins de goma eva nos que cada un/unha aportou o seu gran de area cunha frase para o Día Internacional Contra a Violencia de Xénero. 

Do mesmo xeito, inauguramos o noso taller de pulseiras onde traballamos arreo trenzando a favor do 25N. 

Oxalá algún día non sexa necesario reivindicar este día! 

Saúdos.

En madrugadores O Pino somos conscientes da importancia de comezar a traballar desde idades temperás a prevención contra a violencia de xénero.

É por iso que como motivo do 25N esta semana realizamos unha asemblea con todo o alumnado para tratar dito tema: Que é iso?; Que causas ten?; Cales son as súas consecuencias…

E como toda explicación sempre se entende mellor visualmente… visualizamos un corto sobre a violencia de xénero.

Agora que temos claro que é iso da violencia de xénero estamos quitando a nosa vea máis artística cunha serie de manualidades que vos contaremos a vindeira semana.

Vémonos familias!

Coas ganas de festa aínda no corpo, esta semana realizamos un concurso de baile entre todos os asistentes a madrugadores/as e definitivamente, estes nenos/as levan o ritmo no sangue.

Tamén gozamos dun karaoke por petición dos madrugadores/as.

Sen embargo, non nos faltou tempo para xogar nos nosos recunchos: preparamos un montón de pratos ricos na nosa particular cociña; pintamos fermosos debuxos; fixemos un circuíto con aros e puxemos a proba a nosa creatividade creando diferentes figuras co tangram.

Familias, non esquezades os paraugas que non deixarán de chover novas!

Ata a próxima.

O pasado martes celebramos o Samaín cos nosos madrugadores/as.

Asistiron un montón de gatipedros, nubeiros, homes e mulleres lobo, maruxainas, mulleres e homes do saco…

Pero que é unha festa sen a súa música? Todos/as nos sorprenderon superando un complicado reto musical.

Así, pasamos unha mañá moi terrorífica, pero sobre todo moi divertida.

Esperamos que vós tamén pasarades un bo Samaín! 🎃

Deica outra familias!

Esta semana foi adicada a preparación do Samaín. Nela realizamos diferentes pegatinas terroríficas (morcegos, cabazas, castelos abandonados…) para decorar as nosas ventás da aula de madrugadores e das nosas casas.

Tamén fixemos unhas pantasmas que nos deron moito traballo, pero mereceu a pena porque dan uns sustos espantosos 👻

Para rematar a semana, comezamos a montar o noso photocall para a festa de terror que celebraremos o vindeiro martes 31. A ver quen é capaz de recoñecernos e non asustarse… MUHAHAHA!

Ata a próxima!

Este curso 2023/2024 no servizo de madrugadores poderemos gozar de diferentes recunchos como o recuncho de expresión plástica, o recuncho de lóxica e o recuncho de xogo, entre outros. Estes irán mudando o longo do curso para non perder o interese do alumnado. Neles realizaranse actividades dirixidas e programadas polas monitoras como actividades de xogo libre.

Durante esta semana presentámoslle o alumnado os recunchos que nos acompañarán este trimestre así como as normas de comportamento de cada un deles.

Tamén os estreamos xogando a xogos de mesa no recuncho de lóxica, facendo construcións libres con bloques e xogando a bomba no recuncho de xogo, e por último, no recuncho de expresión plástica comezamos cos preparativos do Samaín xa que se ven unha semana moi terrorífica familias.

Vémonos a vindeira semana!