PENSAR, LEMBRAR E COMPARTIR: ASÍ SON OS NOSOS TALLERES
No taller de memoria que se leva a cabo no Concello de Dodro continuamos cada semana ofrecendo espazos de participación, aprendizaxe e benestar no que as persoas maiores exercitan as súas capacidades mentais de maneira activa, amena e adaptada ao grupo.
A través de propostas variadas e enfocadas ao adestramento cognitivo, traballamos áreas como a memoria, a linguaxe, a atención, o cálculo e a lóxica. Nestes encontros empregamos xogos de mesa clásicos como a escoba ou a belisca, nos que se combina a diversión coa práctica do cálculo mental, a estratexia e a memoria operativa. Así mesmo, realizamos actividades visuais para identificar obxectos iguais ou elementos repetidos, estimulando a axilidade visual e a capacidade de discriminación.
Tamén desenvolvemos exercicios orientados ao campo lingüístico, como buscar palabras que comezan ou rematan por determinadas letras, potenciar vocabulario e clasificar termos segundo distintas categorías (por exemplo, froitas, ferramentas ou animais), reforzando a organización semántica e a evocación verbal. Dentro deste mesmo ámbito, xogamos a pensar palabras que encaixan dentro dunha categoría específica, traballando así o acceso léxico e a fluidez mental.
Outras tarefas que realizamos son sopas de números, busca de diferenzas, ou actividades para localizar imaxes ou palabras repetidas, ideais para mellorar a concentración, a atención sostida e a memoria visual. Tamén propoñemos exercicios máis funcionais, como os que empregan moedas e billetes, para reforzar o cálculo mental e manter familiaridade con elementos do uso diario.
De xeito oral e nun ambiente máis distendido, traballamos habilidades lingüísticas, memoria e rapidez mental con xogos como as palabras encadeadas ou a maleta viaxeira, nos que a creatividade, o humor e a atención xogan un papel protagonista.
Por suposto, tamén reservamos tempo para momentos de conversa compartida, nos que afloran anécdotas, lembranzas e costumes dos tempos pasados, facendo do taller un espazo emocionalmente enriquecedor no que, ademais de traballar a mente, reforzamos vínculos, autoestima e memoria afectiva.
Cada sesión é unha oportunidade para seguir aprendendo, manterse activos e demostrar que, a calquera idade, a mente pode seguir creando, evocando e gozando do presente.
