EN DODRO MÁNTEMOS A MENTE ACTIVA

/en , /por

Despois das vacacións de Nadal, retomamos os talleres de memoria en Dodro, onde en sesións semanais de dúas horas, e que se desenvolven en distintos lugares do municipio (Imo, Tallós, Teaio, Lestrobe, Bexo e Traxeito), fomentan un espacio de sociabilización entre os e as participantes, ao mesmo tempo que a través de distintos tipos de exercicios traballamos a memoria e a estimulación cognitiva.

A través de actividades como o cálculo aplicado á vida cotiá, reflexionamos sobre conceptos útiles relacionados con gastos, compras ou organización do fogar ou coa realización de lecturas comprensivas que nos permiten traballar a atención, a interpretación e o diálogo compartido.

Outro dos nosos puntos fortes é o razoamento lóxico, coa resolución de desafíos sinxelos pero estimulantes, así como propostas léxicas para activar o vocabulario. Ás veces propoñemos retos como “palabras que comecen por C e rematen en A”, “termos con máis de sete letras”, ou palabras relacionadas con diferentes temáticas, dende as estacións do ano ata os alimentos.

E como non podía faltar, adicamos tempo a xogos colectivos coma o bingo, as palabras encadeadas, as rondas de termos temáticos ou outras propostas nas que o humor e o compañeirismo son sempre protagonistas.

Do mesmo xeito, tamén celebramos merendas de Entroido nos que os participantes elaboraban un postre de Entroido da súa elección e no que creamos un ambiente no que os recordos e anécdotas afloran, pasando un  momento máis relaxado no que a socialización, tan importante para un estado de benestar, se produce dun xeito natural.

Outro día para o recordo, foi o dedicado ao Caldo de gloria polo día de Rosalía, sesión na que os participantes compartiron receitas e recordos de tempos nos que a abundancia non era o máis común, favorecendo a creación de momentos de complicidade entre os e as participantes.

Despois destes meses de traballo, podemos dicir, que o esforzo se nota e con cada sesión destes talleres que pasa vamos vendo unha maior soltura e capacidade en todos e todas elas.

ACTIVAMOS E ESTIMULAMOS A MENTE EN PONTECESURES

/en , /por

Dende o finais do 2024 estase a levar a cabo unha nova edición dos talleres de memoria e estimulación cognitiva para os maiores. En sesións de hora e media, e dous grupos semanais creamos un lugar no que a sociabilización deste grupo de idade ao mesmo tempo que a través de exercicios de distinta índole e xogos activamos as capacidades cognitivas dos e das participantes.

Actividades de linguaxe como a busca de palabras que comecen ou rematen por determinado grupo de letras, elementos dentro de distintas categorías, exercicios de agudeza visual, de ordenar alfabeticamente, contas regresivas ou progresivas de números, ordenar unha serie de números de maior a menor ou viceversa, etc. Todos exercicios que pouco a pouco aumentamos a dificultade a medida que os nosos e as nosas participantes van collendo unha maior destreza, e os cales adaptamos aos distintos niveis que podemos atopar no grupo.

Tamén tivemos sesións de xogos, as cartas, xogos de buscar a parella, destreza xeométrica, xogos clásicos como Arriba o lapis, palabras encadeadas, a maleta viaxeira… permítennos seguir traballando nun ambiente máis relaxado e que favorecen os momentos de risas e complicidade entre os e as participantes, momentos esenciais de sociabilización e conexión esenciais para a un benestar mental.

Nestes meses tivemos tempo de celebrar almorzos de Nadal e de Entroido, nos que se crean un ambiente para o recordo e no que as anécdotas e contos saen á luz.

Despois de todos estes meses de traballo, podemos ver grandes avances nas habilidades cognitivas, lingüísticas e na memoria de todos e todas elas.

Todo traballo ten a súa recompensa, e neste caso unha moi grata!

MENTRES A MENTE SE MOVE, A VIDA FLORECE

/en , /por

Dende o mes de setembro, no taller de envellecemento activo do Centro Socioeconómico de Porta do Camiño, vimos compartindo cada semana momentos cheos de aprendizaxe, lembranzas e, sobre todo, actividade mental.

A través de sesións semanais estruturadas e variadas, alternamos exercicios cognitivos que permiten manter o coñecemento activo (gramática, comprensión lectora, cálculo básico, memoria e asociación de ideas…) con propostas lúdicas que estimulan a mente mentres desfrutamos do tempo en compañía. Entre as actividades máis recorrentes están os bingos temáticos, as sopas de letras, crucigramas, adiviñanzas, palabras encadeadas ou descubrir palabras e frases ocultas.

A combinación de aprendizaxe formal e xogo permite que as persoas participantes traballen a súa concentración, axilidade mental e capacidade de resolución, ao tempo que reforzan a autoestima e as relacións sociais. Este tipo de talleres non só teñen unha función educativa, senón que favorecen o benestar emocional e permiten manter viva a curiosidade e as ganas de aprender, independentemente da idade. Actividades como as que levamos a cabo potencian a plasticidade cerebral, melloran a memoria, a linguaxe e a atención. Pero, sobre todo, son unha oportunidade para compartir, rir, falar e sentirse parte dun grupo, creando un espazo de confianza e respecto mutuo.

Cada sesión convértese así nun encontro enriquecedor no que todas as persoas achegan algo valioso: un recordo, unha palabra esquecida, unha nova maneira de resolver un reto… e sobre todo, as ganas de seguir participando activamente na vida.

TALLER DE ESTIMULACIÓN COGNITIVA DE CALDAS DE REIS

/en , /por

Un espazo de traballo, lúdico e sobre todo de encontro cos iguais que ten como finalidade manter activa a mente e polo tanto axuda a potenciar e manter a calidade de vida das persoas asistentes.

Este mes incorporamos novos xogos que nos axudaran a seguir traballando de forma lúdica o rendemento cognitivo xeral ou especificamente algún dos seus compoñentes como a atención, o cálculo, a linguaxe, as funcións executivas, etc.

BROCHE DE OURO

/en , /por

No mes de febreiro comezaban, tanto no CODI coma no Auditorio Municipal de Valga, os obradoiros de estimulación cognitiva organizados polo concello coa intención de contribuír ao envellecemento activo das persoas maiores e ofrecerlles alternativas de socialización.

Após de cinco meses, onde se tratou de frear o deterioro cognoscitivo a través de diferentes exercicios, xogos e de colaborar para obter un maior benestar e calidade de vida dos participantes, puxémoslle o broche de ouro a estes meses de traballo cunha excursión.

O venres 19 de xullo viaxamos en autobús cara o Grove, onde nos agardaba un catamarán para navegar, durante unha hora e cuarto, pola Ría de Arousa. Asemade, puidemos gozar das paisaxes marítimas e achegarnos á actividade das bateas e aos parques de cultivo de mexillóns, ostras e vieiras.

 Pero isto non era todo, no catamarán puidemos gozar dunha degustación de mexillóns e ostras, acompañados dunha bebida refrescante.

Unha vez de volta no porto continuamos cara a nosa seguinte parada… a Illa da Toxa! Unha vez alí, contamos con tempo libre para coñecer a illa, pasear, mollar os pés na praia ou facer algunha compra no centro comercial.

Finalmente, emprendemos a viaxe de volta cargados de agradecemento, ledicia e unha morea de recordos xunto cos compañeiros e compañeiras das rutas de autocoidado e dos usuarios e usuarias do CODI.

UN MERECIDO DESCANSO PARA CUNTIS

/en , /por

Este pasado mes de xuño rematou o curso e con el os obradoiros de estimulación cognitiva e memoria en Cuntis. Un último mes no que seguimos traballando dunha maneira dinámica e entretida os distintos aspectos cognitivos e a memoria. Exercicios de ordenar letras e atopar a palabra oculta, cálculo mental e atopar os sinónimos e antónimos foron algunhas destas tan entretidas actividades.

Como remataba o curso, a última semana fixemos unhas sesións máis relaxadas para despedirnos cheas de xogos e momentos de charla. Xogos de naipes, o Uno, quebracabezas, dominó foron algúns dos recursos empregados nestas despedidas.

Para rematar, e premiar o bo traballo dos e das participantes nestes obradoiros, fomos de excursión a Baiona, á que nos acompañaron os concelleiros Ana Loureiro e Toño González, representantes do Concello de Cuntis. Unha vez alí, visitamos a Virxe da Rocha (houbo xente valente que se atreveu a subir ao miradoiro e observar as fermosas vistas que ofrece), despois de esta actividade para todo o grupo, baixamos ao pobo e alí houbo grupos que se foron de andaina polo paseo que rodea o Parador e o Castelo de Monterreal, outros decidiron visitar a réplica da carabela A Pinta e outros aproveitaron para pasear polo paseo marítimo e tomar un refrixerio nalgunha das súas terrazas. Un día de convivencia e de bos momentos sen dúbida!

Agora toca desfrutar do verán!

DEIXAMOS UN BO SABOR DE BOCA EN PONTECESURES

/en , /por

Despois de un breve, pero intenso curso en Pontecesures, despedimos estes obradoiros de estimulación cognitiva e memoria ata o mes de Setembro.

Neste último mes de xuño traballamos como sempre a través de exercicios dinámicos e que supoñían un reto divertido para as e os participantes, tivemos que atopar a palabra que se agochaba nun palabra previa, fixemos cálculo mental, sudokus, e moitos outras actividades que tiñan á nosa xente dos obradoiros nun estado de superación e reto constante, en Pontecesures gústanlles os retos!

Na última semana, e como despedida, tivemos sesións de bingo e almorzo! Unha despedida moi doce, para darlle a benvida a un verán de descanso. Esperámosvos en setembro con enerxías renovadas!

MOITO TRABALLAMOS EN MAIO!

/en , /por

Este pasado mes e maio continuamos coas nosas sesións de traballo en Cuntis.

A través de exercicios de diversa índole traballamos distintas habilidades cognoscitivas como poden ser a linguaxe, a comprensión e o cálculo. Tamén aproveitamos as sesións para traballar a percepción espacial, a imaxinación e a concentración.

Entre os exercicios que realizamos atópanse exercicios con palabras (busca de palabras con certa cantidade de letras, reordenar as letras e atopar o nome oculto, nomear elementos dentro dunha categoría establecida…). Estes foron acompañados por exercicios de cálculo e exercicios nos que os participantes debían plasmar nun pape as directrices que ían recibindo.

Como non hai que esquecerse de que con xogos tamén podemos traballas a memoria e levar a cabo estimulación cognoscitiva, o mes de maio tamén dou cabida a algún momento máis relaxado e de xogos. Cunha simple baralla, buscando os iguais nunha mestura de debuxos ou con quebracabezas, tamén se pode exercitar a cachola e en Cuntis puxérono en práctica. Hai opcións  para todos os gustos!

Rematado maio, encaramos con moitas enerxías  a recta final deste curso!

MAIO, MES DE RECORDAR E COÑECER NOVIDADES

/en , /por

Despois das primeiras sesións en Cesures no mes de abril, pouco a pouco, e a medida que vamos notando unha maior soltura nos participantes, incrementamos o nivel dos exercicios, adaptándonos deste xeito ás características dos participantes.

Tamén tivemos sesións que nos serviron para recordar e poñer en común anécdotas, recordos e tradicións da zona. De xeito oral, traballamos a memoria e a expresión oral, ao mesmo tempo que favorecemos a cooperación e a socialización entre todo o grupo.

O mes de maio tamén nos levou a coñecer os sudokus. Traballando en parellas conseguimos comprender o seu funcionamento e resolvelo. De novo logramos dunha actividade que a priori non motivaba nos resúltase un reto divertido e motivador.

Encaramos con enerxía xuño!

OS NOSOS RECORDOS SON A NOSA RIQUEZA!

/en , /por

E como ben indica o título desta noticia… OS NOSOS RECORDOS SON A NOSA RIQUEZA! E diso saben moito en Valga, xa que o mes de maio estivo caracterizado polos numerosos debates que fixemos arredor dos recordos: xoguetes e xogos da infancia, música tradicional de cada época e a escola, entre outros moitos.

Alén do anterior, seguimos traballando o desenvolvemento cognitivo e a memoria a través das seguintes actividades: memoria a longo prazo, adiviñando cancións e cantantes dándolles unha soa frase; pensamento lóxico, razoamento e deducir información, descifrando palabras a través dun código de símbolos e letras; comprensión lectora e memoria, ordenando palabras alfabeticamente; cálculo mental; praxias, escribindo as letras que estaban dadas a volta; e rastreo visual, memorizando unha serie de obxectos que despois tiñan que rodear entre unha morea deles.

Por último, algúns dos xogos que levamos a cabo foron: o bingo das froitas (inventado por nós no momento), no cal traballamos a atención, a rapidez, a escoita e a memoria; o tres en raia, onde traballamos a velocidade de reacción, o pensamento motriz e a intelixencia; as sete diferenzas, co cal potenciamos a agudeza e memoria visual; o pasapalabra, para o desenvolvemento cognitivo, lingüístico e social; e, finalmente, a estrela dos xogos: O TELÉFONO AVARIADO. Sen dúbida, co anterior, pasamos grandes momentos de risas e diversión.