Madrugadorxs O Pino

Ola familias!

Como vos prometemos, esta vez vémonos un pouco antes para contarvos as cousas tan chulas que fixemos esta semana preparando o entroido.

Unha das propostas que se barallaron foi unha máscara de entroido, pero claro…  xa temos moitas! así que decidimos que nolo pasariamos mellor facendo outras cousas, unha coroa de rei e raíña e unha careta de león!

Para a coroa utilizamos un vaso de cartón, que recortamos e decoramos con brillantes adhesivos e como non…  purpurina! Que ben sentaban as coroas, algunhas e algúns mesmo quixeron levalas postas a clase, que  importantes sentían!

Coa careta de león traballamos un pouco máis. Un prato de cartón serviunos de base para ela. Con tiras de papel de seda en tons marróns, laranxas e amarelos, formamos a melena do noso león, e con cartolina e un  rotulador negro engadimos os últimos detalles.

A verdade é que o pasamos moi ben preparando o entroido, e como a alegría é contaxiosa, cada día que pasaba  estabamos máis e máis contentos e emocionados, seguro que esta alegría dúranos moito, moito tempo

Vémonos de novo á volta.

Feliz Entroido!!

Ola familias!

Como se respira o amor no aire… Parece que todos e todas somos moi queridxs e queremos moito, porque a proximidade do día de San Valentín tennos moi emocionados.

Por ese motivo estivemos moi activos e activas preparando colares e pulseiras para regalar e demostrar o moito que queremos ás nosas amizades e ás nosas familias.

A semana pasada xa comezamos coas pulseiras da amizade, e gustáronnos tanto que esta semana non faciamos máis que pedir pulseiras e máis pulseiras, imos ter para regalarlle a todo o mundo!

Ademais, fabricamos uns preciosos colares con  palliñas e corazóns de cartolina para ensinar o moito agarimo que temos para dar.

Anda! Agora temos que deixarvos, que nos toca empezar a preparar o entroido!

Un abrazo moi forte (con seguridade, por suposto) e seguímonos vendo, talvez antes do que esperades.

Ola familias! Como sabedes, este 30 de xaneiro foi o día escolar da non violencia e a paz, e para conmemoralo pasamos a semana aprendendo que hai moitas formas de solucionar conflitos sen necesidade de empregar a violencia.

Confeccionamos unhas pulseiras moi bonitas con  gomiñas de cores (e moito significado) para regalar, sobre todo, a aquelas persoas coas que non nos levamos moi ben, para demostrarlles que aínda que non teñamos unha estreita relación, tamén poden contar connosco, e por suposto, tamén aos nosos amigos e as nosas amigas.

Tamén fixemos uns «aneis da paz», que non son máis que unhas preciosas pombas decoradas por nós mesmxs e que podemos poñernos nos dedos. Quedaron preciosas!!

Co noso desexo de que todos os días sexan días para celebrar a paz, despedímonos ata a semana que vén.

Un abrazo de seguridade para todos e todas!

Ola familias!! Aquí estamos outra vez para ensinarvos o activos que somos e o ben que o pasamos. Aínda que estas dúas primeiras semanas do ano tomámolas un pouco de «relax». A semana pasada estivemos moi animados e emocionados contando todo o que nos trouxeron os Reis Magos, debemos ser moi bos e portarnos moi ben, porque a ninguén lle trouxeron carbón, pero si moitas cousas bonitas.

Ademais, a nosa monitora fíxonos un bingo  super chulo da patrulla canina, co que gozamos moitísimo, tanto, que esta semana só pediamos xogar ao bingo!

Aínda así, e despois desa primeira semana poñéndonos ao día, xa empezamos a «traballar», fixemos un pavo real con cartolina e tubos de cartón que nos quedou moi simpático e xa temos máis cousas interesantes previstas para os próximos días… non volas perdades!

Un forte abrazo con seguridade e moito ánimo!

Ola familias! Como non podía ser doutra forma, estes días en O Pino dedicámonos a preparar o Nadal. Bonecos de neve, adornos e panxoliñas encheron a aula e asolagáronnos de espírito do Nadal.

Nestas datas como noutras, non hai nada comparable á satisfacción de facer as cousas con nosas propias mans, así que nos propuxemos que o Nadal nas nosas casas teña un toque máis que persoal. Para iso fixemos unhas tarxetas con forma de boneco de neve na que plasmar o noso desexo do Nadal, unha árbore de Nadal en papel para colgar, e un simpático papá Noel que abraza os nosos lapis,  rotuladores ou o que queira que gardemos entre os seus brazos.

Con agarimo desexámosvos a todas e a todos un bo Nadal e un próspero ano novo!!

Ola familias! A semana pasada conmemoramos o 25 de novembro, Día Internacional da Eliminación da Violencia contra a Muller.

Nós tamén quixemos facelo, e para iso escoitamos o conto «Hai algo máis aburrido que ser unha princesa rosa?»

Despois de escoitalo falamos bastante del e  todxs estivemos de acordo en que debía ser moooooi aburrido ser como querían que fose Carlota, a protagonista da nosa historia, e que todas as princesas poden facer o que queiran, ninguén lles debe poñer límites, así que quixemos facerlle un favor e vestila como a ela gústalle.

Carlota é unha princesa rosa, pero está cansada de selo e non quere pasarse o día bicando sapos para ver se realmente son príncipes. Por que non pode ela rescatar príncipes das garras de lobos feroces ou sucar os mares en busca de aventuras?

Esta é a historia de como Carlota e o resto de princesas puideron deixar de ser princesas rosas porque… Hai algo máis aburrido que ser unha princesa rosa?

Ata pronto!

Ola familias! Esta semana en  Madrugadorxs O Pino decidimos que, aínda que non podamos movernos do noso sitio nin achegarnos aos demais, si que podemos movernos sen desprazarnos! E iso que significa? Pois que gozamos dunha das nosas cousas favoritas, a música, sen descoidar a seguridade.

Sen movernos do noso sitio, levantámonos e bailamos unha canción tras outra, rimos, cantamos e pasámolo en  grande.

Por suposto, complementamos o baile coas nosas habituais actividades de debuxo e pintura, que por petición popular nunca poden faltar.

Ata a semana que vén! Mentres tanto… Botamos un baile?

Ola familias! Novamente, e como é habitual mentres dure esta situación, a semana estivo marcada polo xogo individual.

Para primaria aproveitamos as cores para repasar táboas de multiplicar, con resultados moi artísticos.

En infantil optamos polos números e cores simples, cun final non menos interesante.

Entretivémonos moito con quebracabezas e pasatempos, aínda que os nosos preferidos seguen sendo os enigmas.

Deixámosvos algúns dos que resolvemos entre todos, seredes capaces de atopar a solución como nós?

 – Se un galo situado enriba dun tellado pon un ovo e o vento sopra cara á dereita, cara a onde cae o ovo?

– Como se saca un elefante dunha piscina?

– Que animal salta máis alto que unha casa?

– Cal é o animal que ten máis dentes?

Deixámosvos pensando. Ata a semana que vén!

Ola familias! Despois do empuxón inicial, aquí estamos, en  madrugadorxs O Pino, con forza, enerxía e ganas de comernos o mundo.

Desde agora, semana a semana, estaremos convosco para informarvos de todo un pouco e, sobre todo, ensinarvos as cousas marabillosas que fan vosxs peques. 

Como sabedes, durante a primeira etapa centrámonos na organización e afacernos á nova situación. Son moitas as cousas que cambiaron desde o ano pasado e toca asumilo.

Estivemos debuxando, recortando, pegando e xogando sen movernos do noso sitio. Fíxosenos raro ao principio, pero agora forma parte da nosa rutina diaria. 

Pasatempos e enigmas tomaron protagonismo, hai que ver o que nos gustan os retos! 

Tampouco descoidamos a creatividade, aínda que coas restricións propias da situación, que non nos permite confeccionar nada  equipable (gorros, máscaras e similares). Por iso, para Samaín fixemos un adorno para decorar a porta da nosa casa ou unhas arañas que non estamos seguros de sen son horribles ou moi  cuquis, xulgade vós!

Vémonos a semana que vén. Feliz Samaín!

Ola familias! Un ano máis, comeza o curso en O Pino, e desde  madrugadorxs dámoslle unha benvida repleta de cambios por mor da situación que estamos a vivir.

Con algúns cambios na dinámica, pero coas mesmas ganas e ilusión, damos comezo a esta tempada onde se lle dá prioridade á seguridade e hixiene, aínda que sen descoidar o entretemento, a diversión e a creatividade.

Durante o mes de setembro estivémonos adaptando ás novas normas, lembrando como lavar as mans ou usar a máscara correctamente, e realizando diversas actividades, entre as que se atopa un porta máscaras para gardar a nosa máscara de forma segura, que é unha das cousas que máis imos necesitar este curso escolar.

Cabe destacar que este curso vai estar enfocado ás actividades e xogos individuais ou grupais sen contacto para garantir a seguridade dos cativos.

Afortunadamente todas e todos son xeniais! E estanse adaptando de marabilla, así que se merecen un enorme aplauso.

En marcha e adiante!