E chegou novembro ao Taller de Escolaridade do Concello de Dodro e con el as choivas, o frío, os temporais, as tarefas escolares e os exames!
Foi un mes cheo de traballo para o alumnado de primaria que aos poucos e con esforzo foi facendo fronte a este mes para superalo con éxito.
Voltamos un curso máis coas enerxías renovadas despois do parón que nos obrigou a tomar o COVID-19. Tomando todas as precaucións sanitarias recomendadas de limpeza, ventilación, hixiene, aforo,… seguimos realizando as tarefas escolares diarias e outras actividades de reforzo para poñernos ao día con todo o que quedou pendente do curso pasado.
Polo si ou polo non e aproveitando o Samaín tanto en Imo como en Teaio invocamos aos espíritos con esconxuros que o alumunado tivo que realizar para levar ao cole e así botar ao coronavirus ás cunetas!! Tan ben o fixemos que ata un esqueleto visitounos na aula de Teaio. Que medo!!
Decembro foi un mes de moito traballo, esforzo e nervios para o alumnado do Taller de Escolaridade de Dodro. Tivemos que facer fronte ás tarefas escolares e ás diferentes probas de avaliación que superamos con éxito. Sentíase tamén o nerviosismo no ambiente porque as vacacións de Nadal estaban á volta da esquina!!
Para relaxarnos un pouco preparamos unha riquísima receita de Brownie e para iso seguimos os pasos indicados na nosa “RECIPE” porque en Dodro non só sabemos galego e castelán senón tamén inglés.
Para conmemorar as festas de Nadal non se nos ocorreu mellor forma que crear a nosa propia árbore de Nadal pero non de calquera forma ou con calquera cousa senón reutilizando materiais como caixas de zapatos, papeis de agasallo vellos, papel de aluminio usado, xornais, envases de iogures… É que en Dodro puxémonos as pilas para coidar o medio ambiente cumprindo coas 3R (Reducir, Reutilizar e Reciclar ). Aprendemos ademais a facer bólas e estrelas de papel para decoralo. Cada persoa tivo a oportunidade de decorar a súa propia caixa de zapatos achegándolle o seu estilo e gusto e non vexades canta creatividade ten este alumnado.
Sentimonos moi orgullosas e orgullosos de como nos quedou a nosa orixinal árbore de Nada!e queremos compartir convosco unha foto! Que opinades? Chulo, non?
No Taller de Escolaridade no Concello de Dodro non paramos!! Que se tarefas de clase por aquí, que se exames por alá,…!! Pero de cando en vez tamén sacamos un pouco de tempo para decorar a Casa da Cultura con motivo do Samaín, superar antigos retos e por suposto para xogar e aprender cousas diferentes!
Nestes días alumnas de cuarto de primaria retomaron algún que outro antigo reto que se resistía ( un quebracabezas de “ Ratatouille”); reto que conseguiron superalo con éxito e por iso sentímonos moi orgullosos e orgullosas!! Outros alumnos animáronse a probar con outro quebracabezas, neste caso de “Os Simpson” e traballando en equipo tamén conseguiron acabalo. Un aplauso para todos elas e eles!!
Sorprendente foi tamén a aparición dunha “Bolsa Misteriosa” que escondía obxectos cotiáns que o alumnado tiña que palpar, adiviñar e logo describir sen nomealos para que o resto das compañeiras e compañeiros descubrisen de que obxecto tratábase. Non podemos negar que pasamos un bo intre nunha tarde chuviosa practicando a expresión oral coa “Bolsa Misteriosa”.
Aínda por riba o noso calendario do mes de novembro lembrounos unhas cantas datas importantes: os aniversarios de dous dos nosos alumnos, o Día Universal do Neno e a Nena (20N) e o Día Internacional para a Eliminación da Violencia contra as Mulleres (25N).
Con motivo do 25N fixemos as nosas tartarugas que representan aos personaxes do conto «Artur e Clementina» de Adela Turin e ilustrado por Nella Bosnia. Trátase dunha historia fabulada que reivindica o rol feminino na sociedade, combate os estereotipos sexistas e denuncia a discriminación. Porque aínda se necesitan obras sobre coeducación e igualdade. E por suposto tivemos unha charla debate ao respecto despois de procer á súa lectura.
Non sabemos que cousas novas traeranos o inverno pero irémosvolas contando!!
Co incio do curso escolar tamén comezamos en Dodro co Taller de Escolaridade para o alumnado de Primaria. Este ano contamos con 17 nenas e nenos de diferentes cursos: primiero, segundo, terceiro, cuarto e sexto de Primaria. A pesar das diferenzas de idades e cursos o ambiente que se respira neste taller é marabilloso: rapazas e rapaces colaborando, compartindo momentos de xogo e risas, de amizade, de coidado, de respecto, de agarimo,…
Todos os días traballamos para sacar adiante as tarefas escolares pendentes e os exames – aínda que estemos ao comezo do curso xa tivemos algún que outro – pero tamén temos tempo para liberar enerxía bailando e para relaxarnos coa técnica de Koeppen e unhas cantas respiracións profundas.
Neste grupo tan heteroxéneo no que contamos con persoas escritoras, bailarinas e debuxantes,… hai un xogo de destreza que tivo unha gran acollida: o xogo tipo “ Jenga” ( torre de ladrillos de madeira). Para aquelas e aqueles que xa acabaron as súas tarefas ou que necesitan uns minutos de desconexión para coller forzas contamos con múltiples xogos pero este está a ter un gran éxito entre as persoas asistentes. A pesar de ser un xogo moi sinxelo achega múltiples beneficios xa que exercita a concentración e a paciencia ademáis desenvolve a capacidade de análise así como a toma de decisións.
Foi un comezo de curso emocionante e con novidades do que vos seguiremos contando cousas que xa están en proceso e outras pendentes de comezar para que os nenos e as nenas non só saquen adiante o curso senón que desenvolvan e melloren as súas capacidades e habilidades como persoas.
O 1 de outubro deron comezo na Casa da Cultura de Dodro os Talleres de Escolaridade. Son clases de apoio e reforzo escolar de luns a venres, de 16 a 19 horas para o alumnado que curse primaria.
Nos talleres de escolaridade de Dodro realizamos un pequeno debate sobre os incendios: como previlos, as súas causas, consecuencias, medios que se mobilizan para extinguilo,… E ao rematar fixeron un debuxo sobre o tema. Tratamos este tema polo interese das nenas e nenos motivado polo incendio que afectaron a este concello e a o de Rianxo.
Nos talleres de escolaridade de Dodro continuamos traballando todas as tardes para acadar uns bos resultados académicos: realizando esquemas, resúmenes, facendo deberes, ditados,… Acompañado todo eso de actividades lúdicas e de momentos de distensión como o da merenda.
Nos talleres de escolaridade de Dodro, as nenas e os nenos continúan coas súas tarefas diarias de facer deberes, traballos da escola, estudar,… Pero tamén aproveitan algo o bo tempo para merendar ao aire libre e xogar un pouco, como estes días que disfrutaron xogando un pouco o brilé.
Nos talleres de escolaridade de Dodro as nenas e os nenos continúan a traballar diariamente realizando as distintas tarefas escolares. Pero tamén teñen tempo para repoñer forzas coa merenda e aproveitar un pouco o bo tempo.